Shillong, Risaw 04
Ka Nongkseh SC ka la khur ïa ka jingjop kaba nyngkong na ka Group-B ha ka lympung ïalehkai SSA SRGT 3rd Division Football League 2023, hadien ba ka lah ban pynliem noh ïa ka Mawshbuit SC da 1-0 kol.
Ha kane ka jingïakhun kaba la long ha ka sngi Balang ha madan Third Ground, Polo baroh ar kynhun ki la pyrshang ban ïakhun tyngeh naduh kaba sdang ha kaba ki la ïoh ïa ki kabu kiba biang, hynrei kim shym la lah ban thep kol.
Dei ha ka minit kaba 40 ba ka Nongkseh ka la ïoh ban pynkhih jar nyngkong eh lyngba u Albert Nongsiej ha ka minit kaba 40. Watla ka Mawshbuit ka la pyrshang ban pynphai, hynrei kam shym la lah ban pynurlong haduh kaba kut ka jingïalehkai bad ka la mad ïa ka jingshah rem kaba nyngkong ha kane ka lympung.
Kane ka lympung kan bteng biang ha ka sngi Palei kaba ka PFR Football Academy bad ka Pomlakrai SC kiba don ha ka Group-B, kin ïakhun ha ka por 5:45 janmiet.
