Shillong, Risaw 04
Ka kynhun ki ‘rangïalehkai hockey ka India ka la pynliem noh ïa ka South Korea da 5-3 na ka bynta ban jam sha ka final ha ka Asian Games.
Kane ka la wan urlong lyngba u Hardik Singh (5′), Mandeep Singh (11′), Lalit Kumar Upadhyay (15′), Amit Rohidas (24′) bad u Abhishek (54′), katba u Jung Manjae (17′, 20′, 42′) u la khur ïa ka hat-trick na ka bynta ka South Korea.
Kumta kane ka kynhun ïalehkai ka ri kan pynkhreh ban ïakhun final pyrshah ïa ka kynhun ka ban khur jingjop ha kawei pat ka jingïakhun semi final hapdeng ka China bad ka Japan na ka bynta ban ïaknieh ia ka takma ksiar ha ka sngi Thohdieng.
Lada ka India ka lah ban khur jingjop ha ka final, kan dei ka sien kaba saw ban khur ïa ka takma ksiar ha ka Asian Games bad kan ïoh rung ruh sha ka Paris Olympics ka ban long ha u snem ban wan.
Kham hashwa ka India hapoh ka jingïalam u Craig Fulton (coach) ka la bat ïa ka kyrdan ba hakhlieh ha ka Pool-A hadien ba ka khur jingjop ha baroh ki jingïalehkai, katba ka South Korea ka la wan ha ka kyrdan ba-ar ha ka Pool-B.
Ha kane ka jingïakhun semi final, ka India kaba la bat ïa ka kyrdan balai ha ka kyrdan jong ki kynhun ki shynrang ha ka pyrthei, ka la pyrshah ban ïalehkai bha naduh kaba sdang ha kaba ka la thep nyngkong ha ka minit kaba 5 lyngba u Hardik Singh. Kane ka kynhun ka la pynbud biang ha ka ban thep kol lyngba u Mandeep Singh (11′) bad ïa kaba lai la thep da u Lalit Kumar Upadhyay (15′).
Hadien ar minit ka South Korea ka la pynphai kylla lyngba u Manjae. Une u rangïalehkai u la pynbud ia ka kol kaba ar ka jong u ha ka minit kaba 20. Hadien saw minit ka India ka la thep ïa ka kol kaba saw lyngba u Amit Rohidas (24′).
U Manjae u la khur syndon ïa ka hat-trick hadien ba u la ïoh ban thep ïa ka kol kaba lai ha ka minit kaba 42 hashwa ba ka India kan thep ïa ka kol kaba san lyngba u Abhishek (54′) na ka bynta ban khur syndon ïa ka jingjop.
