Shillong, Risaw 04
Ka kynhun ïalehkai jong ka H.K. Sing Secondary School ka la ïoh rung suk sha ka quarter final ha ka kyrdan ïalehkai Under-14 jong ka 62nd Inter-national Subroto Cup Football Tournament.
Kane ka la wan hadien ba ki bor ba dei khmih jong ka Subroto Mukherjee Sports Education Society (SMSES) ki la lap ïa ka jingshukor jong 15 tylli kynhun ïa ki rta jong ki khynnah da kaba pynïakhun da kiba la palat ïa ka 14 snem ka rta. Te kumta kitei ki kynhun ki la shah weng noh shi syndon na kane ka lympung.
Ha ka jingshisha ka H.K. Sing Secondary School kaba na West Jaiñtia Hills ka la dei ban ïakhun khatduh ha ka Pool-A pyrshah ïa ka IPSC, hynrei kane ka kynhun ka la shah weng noh na ka daw ka la wanrah da ki khynnah kiba la ïaw rta. Te kumta ka Meghalaya ka la ïoh rung ei sha ka quarter final.
Ha ki jingïalehkai ba la lah jong kane ka Group kiba la long ha Bengaluru, ka H.K. Sing Secondary School hapoh ka jingïalam u Bah Hopingstone Suting (coach) ka la jop ïa ka Sainik School haduh 3-0 kol bad ïa ka Kendriya Vidyalaya Sangathan (KVS) kaba na Maharashtra da 1-0 kol.
“Ngi sngewkmen ba lyngba ki ar tylli ki jingjop ki la long ka jingplie lad ïa ngi ban ïoh rung sha ka quarter final. Ha ka jingshisha ngi la dei ban ïakhun khatduh pyrshah ïa ka IPSC, hynrei kane ka kynhun ka la shah weng na ka daw ka la wanrah da ki rangïalehkai kiba la palat ia ka 14 snem karta,” la pynpaw u Bah Hopingstone haba ïakren bad u nongthoh khubor ha ka sngi Balang.
“Ka kynhun jong ngi kan pynkhreh ïa ka jingïakhun quarter final ha ka 6 tarik pyrshah ïa ka kynhun na Mizoram ha ka por 8 baje mynstep,” ula bynrap. Kumba ka paw lyngba katei ka jingshukor ïa ki rta jong ki khynnah ka la wanrah ka jingkulmar jingmut ia ki bor pynïaid bad ruh ban pynbeit thymmai ïa ki prokram ïalehkai.
Watla la dep ban pyn -ïakhun ïa ki jingïalehkai kiba nyngkong mynta ha ka sngi U Blei, hynrei la lap ba ki la don haduh 15 tylli ki kynhun kiba la shah weng noh na ka daw ba ki la pynïalehkai da ki rangïalehkai kiba la palat rta.
Te kumta ïa ki 22 tylli ki kynhun la phiah ha ki phra tylli ki group. Ïa baroh ki jingïakhun la pynlong ha ka lah sngi U Blei, hynrei kane kam shym la pynhun ïa ki bor pynïaid.
La pynlong ïa ka Skeletal Age Estimation Test myn ha ka sngi U Blei bad kane ka long ka kum ki kyndon jong kane ka lympung hapoh ka jingkhmih jong ka All India Football Federation (AIFF). Ïa kane ka jingkhmih bniah la pynlong ha jaka sumar ha Tumkur Road kaba ha Bengaluru da ki doktor ba la thung da ka AIFF.
Ki la don haduh 126 ngut ki rangïalehkai kiba la shah khmih bniah ïa ki rta jong ki bad la lap ba ki la don haduh 87 ngut ki rangïalehkai kiba la palat snem bad tang 34 ngut kiba dangbiang rta. Kane ka jingkhmih bniah ïa ki rta ka long na ka bynta saw ngut ki rangïalehkai na kawei pa kawei ka kynhun bad la lap ba ki la don 15 ngut ki rangïalehkai kiba la palat snem. Ka SMSES mynta u snem ka la shim khia ban khmih bniah ïa ki rta jong ki khynnah ha ryngkat ka jingïatrei lang bad ka AIFF khnang ban rad dyngkhong ïa kane ka jingshukor ïa ki rta jong ki khynnah bad ruh ban wanrah ïa ka jingkhuid ha ka rukom pynïaid ïa kane ka lympung.
Ki kynhun ki ban khur jingjop na kitei ki phra tylli ki group kin ïoh rung sha ka quarter final ha kaba kin ïoh ban ïakhun ha ka 6 tarik mynta u bnai bad ka semi final kan long ha ka 8 tarik. Ïa ka jingïakhun final jong kane ka lympung yn pynlong ha ka 10 tarik mynta u bnai.
