Bertina Lyngdoh
Bun ki jingdonkam ba man u briew u donkam. Ka daw kaba pynlong ban donkam ka long namar ngi dei ki briew ba im. Ki jingdonkam ki long ïa baroh kata la riewspah ne la duk. Lada khlem donkam ym tharai ba u briew un kwah. Kine ki jingdonkam ki kynthup ka pisa, ka bam ka dih, ki jaiñphong, ka jingnang jingstad, ka kam ka jam bad kiwei kiwei. Hynrei kaba kham kongsan na kine ki dei ka pisa bad ka bam ka dih. Ban im donkam ban bam, kumta, ngi trei dohïap ban pyndap nyngkong eh ïa ka bam. Baroh ngim long kiba ryngkat khamtam ha ka ïoh ka kot ne ka kamai kaba ngi kamai. Ha ka pyrthei kyrduh mynta, ka long kaba eh bha ban kamai neh ban ïoh i ta i kamai ka ban lah ban pynmih ïa u bai khaw. Dei namar kane bun u ngat ha kata kaba ngi khot ka jingbam shah.
Ka bamshah ka dei kawei ha kaba ym baroh ym lah lait na ka. ïa kane yn kham mad bha da kito kiba duna ha ka ïoh ka kot. Kine ki dei kum ki nongtrei kynta, nongbylla sngi, kumjuh ruh ïa kito kiba kamai shisien arsien shitaïew. Ym lah len ba bun na ngi, ngi dei kiba duk bad ba donkam lem ïa ka jingisynnei kiwei khamtam ha ka pisa ruh ka bam ka dih. Kumta bym biang ha ka jingïoh, kum ki briew ngi pynmlien ban pyndonkam ïa ka jingisynnei kiwei da kaba ngi bam shah shuwa kum na ki dukan bam, ne shim shah shuwa ïa ki mar ki mata kiba ngi donkam. U nongaishah pat namar ba u don ïa ka jingïatiplem ryngkat ka jingshaniah ïa la ki nongbam nongdih ne ki nongshim shah ïa ki mar ki mata kumta u ai-shah khlem artatien ba kin sa siew biang ia ka jingbamshah ne ka jingshim shah. ïa kum kine ki jingshem la ju isynnei tang da kito kiba mad ïa kajuh ka jingshem.
Hynrei kiba bun pat ki nongai-shah namar ka jingbha palat jong ki, ki nongshim shah ne ki nongbamshah ki ïaid bakla noh sha lyndet jong ki khlem kheiñ bad khlem pyrkhat ba katno uta uba ai-shah u la ïaishah bad sngap namar ba u sngewthuh ba u ruh u dei uba duna ha ka ïoh ka kot. Don ki nongai-shah kiba don ïa ka mynsiem ïarap wat ban pynïoh kam ïoh jam lem ïa la ki nongbamshah namar bad lehse u kwah ba kin kham im ban ïa u. Kumne keiñ ka long ka mynsiem jong katno katne ki nong-ai-shah.
Namarkata, haba ngi sngewthuh ba ngi long kita ki bym lah lait na ka jingbamshah ne shimshah long kita kiba sngew ïa kito ki nongai-shah bad wat kyreit ne sakma noh tang namar ba ngim pat lah ban siew ïa u nongai-shah. Ka jingsngap jar ka jong ngi ne ka jingbym leit mih ka jong ngi sha u nongai-shah ka pynlong ïa uba Aishah ban pyrkhat sniew bad ban ym shaniah shuh ïa ngi. Wat pyrshang ruh ban ai daw khamtam haba kito ki daw kim long kiba biang. Lada ngi kwah ïa ka jingsha-ñiah long kiba khuid ha ka ktien ka thylliej. To ngin ym mlien ruh ban bam shah bun than, ne shimshah bun, namar kane kan pynjynjar ïangi. Kumta, kano kano ka jingbamshah ne jingshimshah kam long kaba sniew hynrei ka dei ïangi ban adkar haba ngi bam bad shim shah namar ki ruh ki donkam ïa ka hok ka jong ki.
