Shillong, Risaw 05
U Myntri Rangbah jong ka Jylla, u Conrad K. Sangma ha ka sngi Palei u la pyllait ïa ka jingñiah thuk-thuk sha kylleng ka ri da ka Yashaswini; ka kynhun jong ki nongñiah thuk-thuk kiba dei ki dkhot ka CRPF Shillong.
Ka CRPF ha ka jingïatreilang bad ka tnat Women and Child Development ka la pynlong ïa kane ka jingñiah thuk-thuk ban rakhe ïa ka Nari Shakti (ka jingpynkup bor ïa ki longkmie) ha ka ri.
Haba ai jingïaroh ïa ka jingshlur kaba khraw, ka jingkut jingmut bad ka jingshlur ba la pyni da ki longkmie jong ki kynhun shipai bapher bapher, u Conrad u la ong ba ki longkmie kim duna ïano ïano bad ba kane ka prokram bad ka jingñiah thuk-thuk ka dei kawei ka nuksa jong ka Nari Shakti. Haba pynpaw ka jingkmen jong u ban ïadon bynta ha kane ka prokram kaba kongsan, u Myntri Rangbah u la ong, “Na ki bynta bapher bapher jong ka ri, ki longkmie nongñiah thuk-thuk jong ka CRPF kin sdang ïa ka jingïaid lynti jong ki bad kin ïakynduh lang bad kumta ka long ka burom kaba khraw ïa nga bad ka jingsngew sarong ban ïadon bynta bad kane ka prokram kaba kyrpang bad sa shisien nga ai khublei ïa ka CRPF na ka bynta kane ka prokram kaba ki la pynlong.”
U Sangma u la ong ba ka jingñiah thuk-thuk ka dei ka jingpyndon burom ïa ka Nari Shakti, kaba long ka dustur kaba la rim bha jong ka dei riti jong ngi bad ka jingpyni ïa ka bor jong ki longkmie. “Ka Meghalaya bad ka deiriti jong ngi, ki briew bad ki jaitbynriew hangne ki la bat ïa kane da ki spah snem. Ka Meghalaya ka dei ka imlang sahlang kaba ai jait sha ka kynthei bad na ka bynta ka jingtip jong ki nongñiah thuk-thuk bad ki ophisar kiba wan na ki bynta bapher bapher jong ka ri kin dap da ka jingkmen ban tip ba ki jaitbynriew jong ka Meghalaya bad ki briew ki la trei na ka bynta ka NariShakri bad ka jingïaryngkat kyrdan da ki spah snem.”
Kum shi bynta jong kane ka sienjam, lai kynhun jong ka jingñiah thuk-thuk da ki longkmie ka CRPF ki dei kiba la pyllait paidbah na Shillong, Srinagar bad Kanniyakumari bad kin ïakynduh lang ha Ekta Nagar, Gujarat ha ka 31 tarik mynta u bnai, kaba dei ka lyngkhuh sngi kha jong u SardarVallabhbhai Patel.
Kane ka jingñiah thuk-thuk kan ïaid lyngba 3291 km bad kin ïaid lyngba hynñiew tylli ki jylla hashwa ba kin ïakynduh lang ha Ekta Nagar.
Ha kane ka sngi la ïadon lang u Bah Paul Lyngdoh, Myntri ka tnat Social Welfare, u AnuragAgrawal, IG NE Sector, CRPF, ki heh pulit, Defence bad ki bor pynïaid ïa ka jylla ki la ïashim bynta lang ha kane ka prokram.
