Venice, Risaw:
Ki bor pyniaid jong ka Venice ha ka Sngi Balang ki la iathuh ba 21 ngut ki nongshong ha kawei ka bos ki la khlad noh hadien ka jingleit hap bakla jong katei ka bos sharud jong ka jingkieng hapoh Venice jong ka Italy. Napdeng kitei kiba khlad, 2 ngut ki dei ki khynnah rit kiba dei na bar ri.
Ha katei ka jingjia, 20 ngut kiwei pat ki dei kiba la mynsaw na ka jinghap jong katei ka bos bad la pynkit ia ki sha ki jaka sumar jong katei hi ka nongbah.
Kumta, ki bor pyniaid ka Italy ki la iathuh ba ki dang ialeh ban pynithuh ia ka kyrteng jong kitei kiba khlad baroh, khnang ba yn ioh ban aiti noh ia ki sha ki bahaiing- hasem jongki.
La ong ba katei ka bos ka dei kaba dang wan phai na kawei ka jaka hapoh Venice bad ka la leit kum hap bakla noh ynda ka leit poi ha katei ka jingkieng ha ka por kumba 7:30 janmiet jong katei ka Sngi Ba-ar.
Ka tnat pynlip ding ka iathuh ba katei ka bos ka la kem ding ha ka por ba ka la hap najrong jingkieng bad ka la leit hap ruh ha ka lynti iaid rel kaba don hapdeng jong ka distrik Mestre bad Marghera jong ka phang North ka Italy.
Ka Myntri Rangbahduh jong ka Italy, ka Giorgia Meloni, ka la pynpaw ia ka jingsngewkhia haba iadei bad katei ka jingjia ba sniewbok bad ka la phah ruh ia ka jingsngewlem sha ka iing- ka sem jong kitei kiba khlad baroh bad ka la kitbok ruh ia kitei kiba mynsaw baroh ba kin koit noh shen.
Katba, ia ka daw jong katei ka jingleit hap bakla ka bos ym pat lah ban tip shai. Hynrei la suba ba u nongñiah jong katei ka bos, u la ioh kem pang kynsan ha ka por ba u poi ha katei ka jaka.
Wat lakatta, la ong ba ka jingdon jong kiba khlad ka dang lah ban kiew namar don katto katne napdeng jong kitei kiba mynsaw, kiba la don hapdeng jong ka jingma bad la ong ba katei ka bos ka la kem ding hadien ba ka iatyngkhuh bad ki wire ‘powerline’ kiba don shajrong jong katei ka lynti iaid rel bad ka la hap ruh kumba 30 phut eiei nalor jong katei ka jingkieng haduh ba kan da poi shatei shapoh ba don ka lynti rel.
