Shillong, Risaw 05
Ka kynhun nongsiat khnam jong ka compound ha ka liang ki shynrang kaba kynthup ïa u Ojas Pravin Deotale, Abhishek Verma bad u Prathamesh Samadhan Jawkar, ka la khur ïa ka takma ksiar ha ka Asian Games kaba dang ïaid shaphrang mynta ka sngi Palei ha Hangzhou.
Kine lai ngut ki rangïalehkai ki la lah ban pynpaw ïa ka jingtbit na ka bynta ban wan ha ka kyrdan ba hakhlieh duh hadien ki la lah ban pynliem noh ïa ki nongsiat kiba na Republic of Korea kata ia u Jaehoon Joo, Jaewon Yang bad u Jongho Kim ha ka jingïakhun final da kaba kamai 235-230.
Naduh kaba sdang jong kane ka jingïalehkai, ka kynhun ki rangïalehkai ka ri ki la lah ban ïalehkai bha, ha kaba ki la lah ban kamai 58-55 ha ka wat kaba nyng-jong jong kane ka jingïakop.
Hynrei ha ka wat ba ar, ki rangïalehkai na Korea ki la ïakhun tyngeh ha kaba ki la lah ban tam da 59-58. Hynrei ha ka wat ba lai ki nongsiat khnam jong ka ri ki la lah ban tam kylla da 59-57. Ha ka jingïakhun kaba khatduh na ka bynta ban rai artad ïa ka nam jop, ki nongïakhun ka India ki la lah ban ïakhun tyngeh ha kaba ki la lah ban khur ia baroh ki 10 point na ka bynta ban khur syndon ïa ka jingjop.
Ha ka semi-final jong ka archery compound men’s team, kitei ki rangïalehkai jong ka ri ki la lah ban pynliem noh ïa ki nongsiat jong ka Chinese Taipei kata ïa u Cheng-Wei Chang, Chieh-Lun Chen bad u Cheng-Jui Yang da 235-224.
Kham hashwa ka kynhun ki nongsiatkhnam jong ka ri kata ka Jyothi Surekha Vennam, Aditi Gopichand bad ka Parneet Kaur ki la lah ban khur ïa ka takma ksiar ha ka women’s compound team, hadien ba ki la lah ban jop da ka said ïa ki nongsiat na Chinese Taipei kata ïa ka Yi-Hsuan Chen, I-Jou Huang bad ka Lu-Yun Wang da 230-229.
Ha kawei pat ka liang, ka nongïalympat jong ka ri ka Antim Panghal ka la lah ban pynliem noh ïa ka khlur ïalehkai kaba la khur takma ha ka Tokyo Olympics ka Bolortuya Bat-Ochir da 3-1 na ka bynta ban khur ïa ka takma rnong, katba kiwei ki nongïalympat ki la ïakynduh jingeh ha kane ka sngi.
Kane ka ‘thei ïalehkai ba dang 19 snem ka rta kaba la lah ban pynliem ïa ka nongïalympat na Japan kaba la bat ar sien ïa ka nam lahduh ha ka pyrthei ka Akari Fujinami ha ka quarter-final, ka la ïakhun tyngeh pyrshah ïa katei ka nongïalehkai kaba na Mongolia na ka bynta ban khur ïa ka takma rnong ha ka 53kg jong ki kynthei.
Kiwei pat ki nongïalympat jong ka ri kata u Narinder Cheema (Greco-Roman 97kg), Naveen (Greco Roman 130kg) bad ka Pooja Gehlot (women’s 50kg) ki la shah rem noh.
