Shillong, Risaw 05
Ka PFR Football Academy ka la khur ïa ka jingjop kaba nyngkong ha ka SSA SRGT 3rd Division Football League 2023 hadien ba pynliem noh ïa ka Pomlakrai SC haduh 4-0 kol ha ka Sngi Palei.
Kane ka la wan urlong lyngba u Asimom Sohtun uba la khur ïa ka hat-trick da kaba thep marwei haduh saw kol.
Ha kane ka jingïakhun jong ka Group-B kaba la long ha madan Third Ground, Polo, ka PFR ka la lah ban ïalehkai bha ha kaba u Asimom Sohtun u la ïoh ban pynkhih jar ha ka minit kaba nyngkong.
Hadien shiteng kynta utei u rangïalehkai shakhmat u la pynbud biang ïa ka kol kaba ar ka jong u ha ka minit kaba 38. U Asimom u la thep biang sa ar kol ha ka kylla miet kata ha ka minit kaba 51 bad 72 na ka bynta ban khur ïa ka jingjop.
Ka jingïalehkai jong ka Group-C hapdeng ka Sanmer SC bad ka Umpling SC kan long ha ka sngi Thohdieng ha ka por 5:30 janmiet.
