Jowai, Risaw 05
Ka lympung ïalehkai 1st Division Football Tournament na ka bynta ka Chatister Kharkongor Memorial Trophy 2023, ka la nangjam shaphang ha kaba ka Sohmynting SC ka la khur ïa ka jingjop.
Kane ka la wan urlong hadien ba ka la lah ban pynliem noh ïa ka Khliehïongriang da 2-1 kol ha ka sngi Palei ha Kiang Nangbah Stadium Ladthadlaboh Jowai.
Hane ka jingiakhun ba la pynïaid da ka West Jaiñtia District Sports Association (WJDSA), baroh ar ki kynhun ki la pyrshang ban ïakhun tyngeh naduh kaba sdang.
Ka Sohmynting ka la ïoh ban pynkhih jar nyngkong eh lyngba u Spain Ryngkhlem ha ka minit kaba 28. Hadien shiteng kynta ka Khliehïongriang ka la lah ban pynphai kylla lyngba u Founder Passah ha ka minit kaba 34 na ka bynta ban ïakhaid mar shi kol haduh kaba kut jong ka kylla step.
Hadien katto katne por ba la bteng ïa ka jingïakhun jong ka kylla miet, u Spain u la pynbud biang ïa ka kol kaba ar ka jong u ha ka minit kaba 58. Haduh kaba kut ka liang pyrshah kam shym la lah shuh ban pynphai bad ka la mad ïa ka jingshah rem.
