Shillong, Risaw 05
U Myntri Rangbah ka Jylla u Conrad K Sangma u la kdew katto katne ki jingïohi jngai ka Sorkar Jylla ban kyntiew ïa ka Meghalaya na kaba kham bha sha kaba bha tam eh ha kaba u la ong ïa ki ophisar ban nym ieh teng haba pyntreikam ïa ki jingthmu kiba ka Sorkar ka la don bad ban pyntikna ba ki jingïatreilang kin pynpoi ïa ka Meghalaya sha ka ïoh ka kot kaba long $10 billion.
U Conrad u la pynpaw ïa kane haba kren sha ki ophisar ha ka jingïalang jong baroh ki Deputy Commissioner, ki Sub-Divisional Officers (Civil) bad kiwei kiwei ki ophisar kaba la long ha Hotel Pinewood ha Shillong ha ka sngi Palei.
Kane ka jingïalang ka dei ka sienjam ban dup lah ban pynbeit ïa ki jingeh kiba don ha ka roi ka kiew bad kumno ban pynkhreh ïa ki jingtreikam ban poi sha ka lawei kaba phyrnai na ka bynta ka Jylla.
Ha kane ka jingïalang, ki riewshemphang ryngkat ki ophisar ki la ïatai sani ha ka liang ka rukom treikam, ka jingai jingshakri lyngba ka Sorkar bad ka jingïatreilang hapdeng ki tnat treikam bapher bapher ban poi sha ka thong.
Haba ban jur ban bteng ïa ki kam babha kiba ïatreilang kum ka kynhun bad ban peitngor ka ki kam naduh na tbian eh ka jingtreikam, u Myntri Rangbah u la ong ba ki kor ki bor ki don la ka bynta bad u ngeit ba ki jingbuhthong kiba la don lyngba ki prokram kum ka CM Connect, Village Data volunteers, DC Connect bad Family ID programme kin sa pyni ki soh kham kloi ha rukom treikam.
U Conrad u la phah pynleit jingmut ruh haba ïadei bad ki skhim kum ka Jal Jeevan Mission, PMAY, CM Solar Mission, ki jingpynïasoh bad u la kyntu ïa ki DC, SDO (civil) ban long kiba bteng ban peitngor haba pyntrei ïa ki projek.
Shuh shuh u Myntri Rangbah u la ong ba donkam ruh ïa ka jingai jingmut lem ki ophisar ha kiba bun ki liang, bad donkam ban leh ei ei ban pyntikna ba ki jingthmu kiba pyntreikam kin pyntikna ruh ba ki jingïatreilang ki ban pynlong ïa ka Meghalaya ban poi sha ka ïoh ka kot kaba long $10 billion.
U Commissioner & Secretary (Planning Department), u Dr. Vijay Kumar D, u la batai shaphang ki jingïohi jngai kiba la don bad ki lad ki lynti kiba thymmai ban ai jingshakri Kum ka Village Data Volunteers, CM-Connect, Family ID program.
U Kumar u la ong ba ka don ka projek kaba wan na ka World Bank ban wanrah ka jingkiew ha kane ka Jylla bad kum ki shakri Sorkar kiba trei namar ki paidbah, ki donkam ïa ki buit bad jingshem thymmai ki ban plie tala ban ïohi ïa ka lawei kaba phyrnai jong ka Meghalaya.
