Shillong, Risaw 05
Ka India ka la nangjan ban kynjoh sha ki 100 tylli ki takma ha ka Asian Games 2023 namar ha ka sngi Palei ka la khur 86 tylli ki takma, kiba kynthup ïa 21 ki takma ksiar, 32 ki rupa bad 33 ki rnong.
Ha kane ka sngi, ka India ka la bynrap sa lai tylli ki takma ksiar lyngba ka Dipika Pallikal bad u Harinder Pal Singh kiba la khur ïa ka jingjop ha ka squash (mixed team), kumjuh ka kynhun ki nongsiat khnam (men’s and women compound) ki la wan ha ka kyrdan ba hakhlieh.
U Saurav Ghosal u la khur ïa ka takma rupa ha ka jingïakhun para marwei jong ki shynrang ha ka squash. Ka Antim Panghal ka la khur ïa ka takma rnong ha ka wrestling jong ki kynthei.
Ha kawei pat ka liang u khlur ïalehkai badminton u HS Prannoy u la jam sha ka semi final ha ka men’s singles, hynrei ka jingiaid lynti ka PV Sindhu ha ka Asian Games ka la poi sha kaba kut ha kaba ka la shah rem noh ha ka ‘thei ïalehkai na China ka Bingjiao He ha ka quarter final jong ka women’s singles.
