New Delhi, Risaw:
U MP jong ka seng AAP u Sanjay Singh u la shahkem ha ka kynhun Enforcement Directorate ha ka sngi Balang ha kaba ïadei bad ka jingshah kynnoh donkti ha ka jingkamai ïa ka spah ba beaiñ.
Une u la shahkem hadien ba ki la don ki jing-leit khynra jong ki heh ka kynhun ED ha ka jaka sah jong u ha kaba ïadei bad ka jingshah kynnoh donkti ha ka jingpyndkoh treikam ha kaba ïadei bad ka kyiad.
Hynnin ka step, u Myntri Rangbah jong ka Delhi u Arvind Kejriwal u la ong ba ki jingleit khynra jong ka kynhun ED ïa ka jaka sah jong u nongïalam jong ka seng AAP ka pyni ba ka seng BJP ka la sdang ban don ha ki jingkhuslai naba ka la sngewthuh ban shah rem ha ka jingïakhun ha ka ilekshon Lok Sabha 2024.
Kiba kum kine ki jingkhynra kin sa don hynrei ym dei ban don jingsheptieng, la ong u Kejriwal.
Ha ka sngi Balang, ka seng Bharatiya Janata Party (BJP) kaba la lum da ka kynhun ha ka thaiñ ba don ha ka ITO ha Delhi bad ha ka jaka treikam jong ka seng Aam Aadmi Party (AAP) ka la bthah ïa u Myntri Rangbah bad u heh nongïalam ka seng u Kejriwal ba un iehnoh kam ha kum kane ka por ba dang ïaid shakhmat ka jingshah khynra jong u MP ka AAP u Sanjay Singh ha ka kynhun Enforcement Directorate (ED) ha kaba ïadei bad ka jingdonkti ha ka jingpyndkoh treikam halor ka kyiad ha Delhi.
Ki lad pathai khubor ki la pynsaphriang ïa ki Video ba la pyni ïa ka jingthoh kaba ong: “U snar nongïalam jong ka kam bamsap kaba la mih na ka rukom pyntreikam halor ka kyiad, uba dei u paralok jong u Kejriwal, u la long u nongsakhi jong ka sorkar. Iehnohkam Kejriwal.” Ka seng BJP ka la pynbna ruh ban pynlong da ka jingïakhih habar ka jaka treikam jong ka seng AAP kaba don ha Delhi.
