Shillong, Risaw 05
Ka lympung ïalehkai Cricket World Cup 2023 ka la sdang ha ka sngi Palei ha Narendra Modi Stadium kaba ha Ahmedabad ha kaba ka England kaba bat ïa nam lahduh ka ïakynduh pyrshah ïa ka New Zealand bad kane ka long ka jingïai bteng ïa ka final jong u snem 2019.
Ka jingkhmih lynti na ki bor pynïaid jong kane ka lympung ka long ban ïohi ïa ka jingdap kane ka stadium, hynrei ka la long da khongpong ha kaba ïohi hapoh ki social media ïa ka jingthylli katei ka stadium ha ka sngi sdang jong kane ka lympung kaba long tang shi bynta na ka saw bynta.
Ki nongpyndonkam ha social media ki la buh ïa ki dur jong ka stadium kaba thylli ha kane ka sngi sdang bad kane ka la buh ka jingkylli ba na kaei ka daw ba ki paidbah kim shym la don watla la dep ban die lut ïa ki tiket hashwa ban sdang ka Cricket World Cup 2023.
Na ka liang ka khlur ïalehkai kriket jong ka ri England ka Danielle Wyatt ka la pynpaw ka jingsngew bynñiaw halor kane ka jingthylli katei ka stadium ha ka sngi sdang.
U kapten ka New Zealand u Tom Latham uba la jop ïa ka kynting pisa bad u la rai ban kawang bol shwa nynggkong pyrshah ïa katei ka lahduh ka England ha kaba sdang jong kane ka lympung.
Te kumta u Latham u la shimti kum u nongïalam jong kane ka kynhun na ka daw ka jingbym lah ban ïalehkai lang u kapten u Kane Williamson, uba don hapdeng ka jingmynsaw ka khohsiew. U Lockie Ferguson u la duh ïalehkai na ka daw ka jingmynsaw, katba u Ish Sodhi bad u Tim Southee kim shym la don lang hapoh kane ka kynhun.
Na ka bynta ka England, u Ben Stokes u la duh ïalehkai ha kane ka jingïakhun na ka daw ka jingmynsaw ha ki bynta jong ka syngkai, katba u Gus Atkinson, Reece Topley, David Willey kim shym la don hapoh ka thup jong ki khadwei ngut jong kane ka kynhun.
Haba phai sha ka jingïakhun jong kane ka sngi sdang, ka New Zealand ka la lah ban pynliem noh ïa ka England da 9 wiket.
Ka England kaba la shimti ban tied nyngkong ka la kamai 282 and shah pynkhyllem noh 9 wiket. Haba wan shimti ïa ka pali ba ar ka New Zealand ka la lah ban kynjoh sha ka thong da kaba kamai 283 run bad shah pynhap 1 wiket ha ki 36. 2 over.
