Shillong, Risaw 06
Ka Meghalaya ka la pynjem khnap ïa ka Jammu & Kashmir haduh 11-0 kol ha ka lympung ïalehkai Junior Girls’ National Football Championship (Tier 2) bad ka Eiladki Ksoo ka la thep marwei haduh san kol.
Kane ka long ka jingjop kaba lai ïa ka Meghalaya na ka bynta ban bat ïa ka kyrdan ba hakhlieh jong ka Group-B da kaba ïoh kamai 9 dor-thong hadien ba ka la lah ban pynliem ïa ka Telangana da 4-1 kol bad ïa ka Rajasthan da 6-0 kol.
Ha kane ka jingïalehkai kaba long ha ka sngi Thohdieng ha Jaipur, ka kynhun ki ‘thei ïalehkai ka la ïoh ban pynkhih jar nyngkong eh lyngba ka Eiladki Ksoo ha ka minit kaba nyngkong. Kane ka kynhun ka la pynbud biang ïa ka kol ba ar lyngba ka Alisha Lyngdoh ha ka minit kaba 23.
Hadien shiteng kynta ka Meghalaya ka la pynbud ïa ka kol ba lai lyng -ba ka Eightfulnes Shang-diar ha ka minir kaba 32. Ka Eiladki ka la thep biang ïa ka kol ba ar ha ka minit kaba 45+5 na ka bynta ban pynlong ïa ka Meghalaya ban tam da 4-0 kol ha kylla step.
Hadien katto katne por ba la bteng biang ïa ka jingïakhun jong ka kylla miet ka Eiladki ka la khur syndon ïa ka hat-trick hadien ba ka ïoh thep biang ïa ka kol ba lai ha ka minit kaba 49.
Ha kane ka jingïakhun na ka liang ka Meghalaya kam shym la ailad ïa ka liang pyrshah ha kaba ka la thep biang ïa ka kol ba san lyngba Bira Pyngrope ha ka minit kaba 62. Hadien shi minit ka Jylla ka la thep biang lyngba ka Alisha Lyngdoh bad ïa ka kol kaba hynñiew lyngba ka Ba Inangsan Langbnang ha ka minit kaba 67.
Ka Eiladki ka la thep biang sa ar kol ha ka minit kaba 83 & 85. Ïa ka kol kaba khatduh la thep da ka Alisha Lyngdoh ha ka minit kaba 88. Watla ki thei ïalehkai ka Jammu ki la pyrshang ban pynphai, hynrei kim shym la lah ban pynphai bad ha kaba kut ka la mad ïa ka jingshah rem.
