Kolkata, Risaw:
Ki la don ar ngut ki briew kiba la ïap bad saw ngut kiwei pat ki la mynsaw ha Jalpaiguri distrik kaba don ha West Bengal naba u Mortar Shell, kumba la ïoh jingtip ba u la shah rong na ka jingshlei um jong ka wah Teesta u la bthei noh, la ïathuh ki pulit hynnin ka sngi.
Ki pulit ki la ngeit ba une u Mortar Shell u dei jong ki shipai ka tnat Army bad uba la shah rong noh ha ka jingshlei um na ka jaka treikam jong ki shipai ha Sikkim ha ka sngi Balang. Ka tyllong khubor kaba la wan na ki pulit ka thaiñ ka la ong ba kane ka jingjia ka la jia ha ka shnong Chapadanga kaba don ha Kranti blok ha ka sngi Palei haba uwei u briew u la shim ïa une u Mortar Shell na ka wah bad rah sha ïing na ka bynta ban die tiar jot bad pyrshang ban pynpait ïa u, ha kaba ha kane ka por u la bthei kynsan bad shim ïa ka jingim jong ar ngut bad pynmynsaw ïa saw ngut kiwei pat.
“Ïa ki saw ngut ki briew kiba la mynsaw la pynkit noh sha ka jaka ai jingsumar. Ka jingtohkit ha kaba ïadei bad ka jingjia ka dang ïaid shakhmat. Ha kaba ïadei bad kane, ki pulit jong ka Jalpaiguri ki la pynmih ïa ki hukum bad kyntu ïa ki briew ba kim dei ban bat ne shim ïa kino kino ki tiar siat ne pynbthei lada ki lap ba ki don ha kane ka wah. “
Na ka jingjur palat u slap uba la wanrah ïa ka jingshlei um ha Sikkim, kiba bun ki tiar pyndonkam bad ki tiar siat bad pynbthei jong ki shipai ki la shah rong lut sha ka wah Teesta. Ngi buh ka jingkyrpad ïa ki riewpaidbah ba kin long kiba husiar bad ba kin ai jingtip mar mar sha ki pulit kiba don hajan ka thaiñ jong ki lada jia ba ki ïohi ne lap ïa kino kino ki tiar kiba i phylla, ki song, ki tiar siat kiba tuid ha ka wah,” la ong ka jingthoh kaba la wan na ki heh pulit.
