Bertina Lyngdoh
Ym lah ban thied, ym lah ban die, bad baroh u hap ban ïoh mad ïa ka 24 la 7 kynta phin ioh ïa ka lada hap ne ioh pdiang ïa ka. Lada naduh tynrai ngi ïoh ïa ka, shilynter ki sngi ruh phin kmen ha ka. Dei ha ka, ngi im, ngi kmen, sngewsih bad ïap ruh. Shisien ba ka don bad ngi ha shilynter ka jingim, ngi kmen ngi biang watla ngi duk ha ka spah.Nalor kane, ka long ruh kum kata ka nongpynkhiah ïa ka pang ka shitom ne ïa ka mynsiem ba mong. Wat la na baroh ki liang, ngim ïoh pdiang bad mad ïa ka, hynrei na tynrai te ngi donkam ïa ka. Kata ka dei ka jingieit.
Ka jingieit ka dei kawei kaba baroh u donkam ïa ka. Nyngkong eh, baroh u donkam ïa kane na la rympei. Ka jingieit na la rympei ka long ka dawbah ka tynrai ka jingieit. Kiba ïoh ïa ka jingieit tynrai, ki pher na kito ki bym ïoh ïa ka. Kane ka dei ka jingieit kmie, jingieit kpa, ki hynmen ki para, u mama u kñi, ki kha bad kumta ter ter. Kiba ïoh ïa ka jingieit na kine, kim donkam ban im khuslai naba haki ladep ban seng ïa ka jingieit ka bymjukut. Ka jingieit tynrai kam dei tang ïa u shynrang ne ka kynthei, hynrei ka dei ïa baroh ar namar dei maka ba pynbha ruh pynsniew. Ka jingbym ïoh ïa ka jingieit tynrai ka wanrah ïa shibun ki daw ban nym bha ka jingim jong ki.
Ka jingbym phikir ïa ka koit ka khiah, ka jingngop ha ki kam sniew, ka jingbym shim khiah ïa ka pule puthi, ka jingbym ieit ïalade, ki long ki katto katne ki daw ka jingbym ioh ïa ka jingieit tynrai. Ka jingieit tynrai nyngkong eh, ka dei na ka kmie ba pun ba kha, bad na u kpa u nong-aija bad bud pat sa kiwei ki jingieit. ïa kiba duh ïa ka jingieit tynrai ki mih ki jingkylli ba balei lada ki kmie ki kpa kiba dang im ha kane ka sla pyrthei ki hun ban im jngai na la ki khun ki kti haba ki tip bha ïala ki jong ki khun ki kti. Don lei ki kmie ki kpa kiba leh bym bna ïa ki jong ki khun ki kti ïa kaba kila dep pun dep kha. Ka jingim ba marwei jong ki jngai na la ki khun ka kren shai ba kim ieit la ka snam ka doh ba la dep pun bad kha. Namar kane keiñ, ka pynlong ïa ki khun ban duna dor noh ka jingim, bad ban kheiñ ïap noh ruh la ki jong ki kmie ki kpa wat la ki dang im. Nalor ba ki duh ïa ka jingieit kmie kpa, ki duh ruh ïa ka jingieit na ki bahaïing bahasem, kaba pynlong pat ïa ki ban shang makia bad wad jingieit tang ba kin wan phai biang sha ka jingim ba bha.
Kumta, long ki kmie ki kpa kiba shisha, ban nym shah pynkit ha phi ïa ka nam sniew. Long ka tnum ka ban ri ban lum bad ban pynïatylli lang la ki jong ki khun kiba long ki mynsiem jong phi. Wat ap haduh ba por kan dier, ba ioh ka jingithuh kmie kpa kam don shuh. Lada ha phi ka burom, dei ha phi ruh ka burom ki khun.Namarkata, shisien ba la shim ïa ka lyngkor, pyndep ruh ïa ka ba hakhmat U Blei phin ïoh ka burom.
