Jamaica, Risaw:
Kumba 60 ngut ki khynnah skul jong ka Jamaica ki la kem pang bad poi hospital hadien ba ki ioh bam ia u mit-mit ‘candy’ ba la shna da ki kynja jingdih pynbuaid ‘Cannabis’, la iathuh u Myntri ka tnat pule- puthi jong ka Carribean.
Ka Myntri ka tnat pule-puthi jong ka Jamaica, ka Fayval Williams ha ka Sngi Ba-ar, ka la iathuh ba kitei ki khynnah ki la ioh bam ia utei u jait mit-mit uba la shna na kitei ki jingdih pynbuaid lane u ‘kynja’ kumba ju ia tip paidbah. Kumta, ka Fayval ka la ong ba ka long kaba donkam ban ïeng ryntih lang baroh ban pynkhlaiñ ia ka jingiada bad ban wanrah ia ka jingsuk- jingshngaiñ hapoh ka ri, ban pyllait khamtam ia ki khynnah na utei u jait jingdih uba sniew bad ban nym ai lad ia ki khynnah bad ki khun khynnah ka ri ba kin ngop ha kum kitei ki jait jingdih kiba sniew.
Ha ka miet Sngi Nyngkong, ka Fayval ka la pynsaphriang paidbah ia kawei ka dur, kaba ka la iathuh ba kitei ki kynja mit-mit kiba bun rong, ki don kumba 100 Milligram u Tetrahydrocannabinol (THC) bad kane kan ktah jur ia kito ki khynnah kiba ioh bam ia utei u jait jingbam uba sniew.
Uwei napdeng jong kitei ki khynnah uba la ioh kem pang, u dei uba la bam tang 1 symboh jong kitei ki mit-mit bad u la ioh kem pang noh. Kumta, la lah ban sngewthuh ia ka jingma bad ka jingktah jong utei u jingdih pynbuaid uba la khleh ha kaba shna ia kitei ki jingbam lane ki mit- mit.
