Groza, Risaw:
Katkum ki khubor la iathuh ba kumba 51 ngut ki la khlad noh na ka jingther ‘namding jong ka Russia sha ka phang Shatei Lam Mihngi jong ka Ukraine ha ka miet Sngi Palei. Kumta, ka Ukraine ka la pynlong da ka jingleh burom ba khatduh ban sngewlem ia kitei ki shipai ka Ukraine kiba la khyllem noh ha ka jingthombor dusmon jong ka Russia ha katei ka sngi. Kane ka la jia hapoh ka shnong Groza jong ka nongbah Kharkiv.
La ong ba ha katei ka sngi, wat kito ki ‘riew paidbah kiba don ha katei ka juh ka mala kaba long ka jaka iadie- iathied, ki la ngat bad khlad lang ha ryngkat bad ki shipai ka Ukraine kiba ap pahara bad kiba iakhun na katei ka bynta. Katei ka shnong ka dei kaba dang don tang kumba 330 ngut eiei ki paidbah nongshong shnong.
Ka Lamphang jong ka Regional Assembly ka Ukraine, ka la iathuh ba katei ka jingiap ka la long kaba jur bad ba shyrkhei tam ba ka Ukraine ka la iohmad ha kane ka kynti bad ka bym pat ju jur mynno- mynno ruh naduh ba sdang ka thma haduh kane ka kynti ba ka jingdon kiba khlad ha ka shisien shah thombor kan kot ia ka 50 ngut.
Kumta, ki pulit bad ki shipai ka Ukraine, ki la iatrei lang ban sei ia kitei ki metiap bad ban song ia ki hapoh ki sop rong lieh bad la pynkit ia ki hapoh ki trok ki ban leit rah bad pynpoi ia kitei ki metiap baroh sha ka nongbah Kharkiv, ha kaba ki tnat ka koit ka khiah kin leh sa ia ka DNA test.
Kumjuh ruh la ong ba kawei ka longiing, ka la iap pait dohnud ha katei ka miet hadien ba ki la shem ia u khun jongki, u bym don shuh ia ki kti, kjat bad wat ka khlieh ruh ka la poi lakajong. Hynrei la shu ithuh ia u na ki kot ki sla kiba don ha ka met bad hajan ka jaka ba la lap ia u.
