Shillong, Risaw 06
Ka India ka la ïai bteng ban khur takma ksiar ha ka Asian Games hadien ba ka kynhun ki rangïalehkai hockey ka la lah ban pynliem noh ïa ka Japan kaba dei lahduh jong ki saw snem ba la dep da 5-1 ha ka jingïakhun final kaba la long ha Hangzhou ha ka sngi Thohdieng.
Naduh kaba sdang ka jingïa-khun baroh ar kynhun ki la pyrshang ban ïakhun tyngeh. Ha ka kylla step ka India ka la tam da 1-0 lyngba ka kol ba la thep da u Manpreet Singh. Ïa kiwei pat ki kol la thep ar kol da u kapten u Harmanpreet Singh, ryngkat u Amit Rohit Das bad u Abhishek.
Kane ka long ka sien kaba saw ban khur ïa ka takma ksiar na ka kynhun ki rangïalehkai hockey ha ka Asian Games hadien ba la la khur jingjop ha u snem 1966, 1998 bad 2014.
Lyngba kane ka jingjop, ka India ka la khur ïa ka takma ksiar kaba 22 ha ka Asian Games na ka bynta ban pynlong ïa ka ri ban kynjoh sha ki 95 tylli ki takma.
Haba phai sha ka kabaddi jong ki kynthei, ka India kaba la bat ar sien ïa ka nam lahduh, ka la jam sha ka final ha ka sien kaba saw ha ka Asian Games hadien ba ka la lah ban pynliem noh ïa ka Nepal da 61-17 ha ka sngi Thohdieng.
Ha kane ka jingïakhun ka India, kaba la wan ba-ar ki saw snem ba la lah, ka la ïakhun tyngeh naduh kaba sdang ha kaba ka la lah ban tam 29-10 ha ka shiteng kynta lyngba ka Pooja Hathwala bad ka Pushpa Rana.
Na ka bynta ka India, ka ‘thei ïalehkai na Jharkhand ka Akshima kaba la ïoh ban ïalehkai ha ka sien kaba nyngkong ha ka Asian Games ka la lah ban ïalehkai bha.
