Hyderabad, Risaw:
U Myntri Rangbahduh Narendra Modi ha kine ki khyndiat sngi ba la leit u la pynpaw ba u heh nongïalam jong ka seng BRS bad u Myntri Rangbah jong ka Telangana u K Chandrasekhar Rao u la kwah ban pynïasoh bad ka kynhun NDA hadien ba ka seng BJP ka la jop ha ki 48 tylli ki konstitwensi ha ka jingïakhun ïa ka ilekshon GHMC ha u 2020.
Ha ka jingai jingkren ha ka jingïalang paidbah kaba la long ha Nizamabad, u Myntri Rangbahduh u la ong: “U KCR u la ai ïa nga ïa ka jaiñ tawah kaba itynnad bha bad pyni ïa ka jingïeid kaba haduh katta katta, ha kaba kam don ne dei ka jinglong ne jingsngew jong u. Hadien kane u la ong ïa nga ba ka ri ka la treikam bha hapoh ka jingïalam jong nga. Ngi la kwah ruh ban long shi bynta jong ka kynhun NDA. Nga ong kaei pat? Ai jingkyrshan ïa ngi ha ka Municipal Corporation ha Hyderabad.”
Wat lada u Myntri Rangbah jong ka Telangana u la tyrwa ban pynïasoh bad ka kynhun NDA lada jia ba ka seng BJP ka tyrwa ban pan jingkyrshan na ka seng BRS (kaba dei mynshwa ka seng TRS) ha ka GHMC, u Myntri Rangbahduh u la kyntait ïa ka jingwan rung jong kane ka seng ha ka kynhun synrop.
