Hyderabad, Risaw
Ka Telangana ha ka sngi Thohdieng ka la pyllait paidbah ïa ka “Chief Minister’s Breakfast Scheme” na ka bynta ki khynnah skul, halor ka jingthmu ban pynbiang bam sha ki 23 lak ngut ki khynnah jong ki skul sorkar.
Ki Myntri jong ka Telangana kiba kynthup ïa u KT Rama Rao ki la pyllait paidbah ha kiba bun ki jaka ïa kane ka skhim. Ha ka jingai jingkren jong u hadien ba la dep ba pyllait paidbah ïa kane ka skhim, u Myntri uba dei khmih ïa ka IT and Industries u Rama Rao u la ong ba ïa kane ka skhim yn sa pyntreikam sha ki 27,147 tylli ki skul sorkar kiba don ha kylleng ka jylla.
“Ka jingbam step ka long kaba tei bha. Ka jingmad ruh ka long kaba bang bha,” la ong u Rama Rao. U Rama Rao u la bthah ïa ki heh sorkar ba ki la dei ban pyntikna ban pynlong ïa ka jingbam kaba bha bad kaba bit na ka bynta ban bam da ki khynnah skul bad la dei ban bteng ha ka ban shim ki nongmuna na ka bynta ban khmih bniah ïa ka rukom long jong ki na ka por sha ka por.
Ïa kum kane kajuh ka skhim ha Tamil Nadu la pyntreikam na ka bynta ki khynnah skul jong ka klas 1 haduh 5. Ha kaba ïadei bad kane, u Myntri Rangbah jong ka Telangana u K Chandrasekhar Rao u la kwah ruh ban pyntreikam ïa kane ka skhim na ka bynta ki khynnah skul kiba haduh ka klas 10, u la ong shuh shuh.
