Manila, Risaw:
Ka Philippines ka la pynjur ia ka jing-ap pahara ha kiba bun tylli ki Kad Liengsuiñ hadien ba la ïohsngew ia ka khubor ba lah ban shah riam bom bad shah pynbthei bom ha kito ki liengsuiñ ki ba mih na Manila, kynthup ruh ia katto katne ki jaka jngoh kai pyrthei jong katei ka ri.
La ong ba ka tnat Civil Aviation Authority of the Philippines (CAAP) ha ka Sngi Thohdieng, ka la pyntip ba ki bor pyniaid jong ka Philippines ki la pynkhlaiñ ia ka jing pahara ha ki 42 tylli ki Kad Liengsuiñ kiba don ha kylleng jong ka ri, hadien ba la ioh ia katei ka jingbyrngem pynbthei bom na ki briew bad ki kynhun bym don jingithuh ha katei ka sngi.
Ia katei ka jingbyrngem la phah sha ka ‘Email’ jong ka ‘Air Traffic Services’ bad ba la byrngem pyrshah ia ki liengsuiñ kiba mih na ka nongbah Manila bad kiba leit sha Davao, Bicol bad sha kiwei de ki jaka kiba long ki ju paw bha ha ka kam jngoh kai pyrthei kum ha ki bynta jong ka Palawan bad ka Cebu. Katba, ka tnat CAAP kam shym la pynshai ba ha kano ka sngi lane ha kano ka por ba la ioh pdiang ia katei ka jingbyrngem.
