Shillong, Risaw 06
Ka Meghalaya Sport Climbing and Mountaineering Association (MSCMA) ka la rai ban pynsangeh noh ïa ka State Level Sport Climbing Selection trials na ka daw ka jingjur slap bad ka lyer naduh ka sngi Palei.
Ha ka jingshisha na ka liang kane ka synjuk ka la pynlong ïa kane ka prokram ha ka sngi Thohdieng ha Artificial Climbing Wall jong ka 58 Gorkha Training Centre, Happy Valley bad kan kut ha ka sngi kaba bud (7 tarik), hynrei na ka daw ka jingjur palat u slap, la hap ban pynsangeh noh ïa kane ka prokram namar ka lah ban buh jingma ïa ki khynnah bad kan sa pynbna pat hadien.
Ha kane ka sngi sdang ïa kane ka prokram ha ka sngi Thohdieng la wan ban plie da u Working President ka Meghalaya State Olympic Association u Bah John F. Kharshiing kum u kongsan, katba u Bah Khroobok Passah, Asst. Director ka tnat Directorate of Sports and Youth Affairs (DSYA) kum u symbud kongsan. Ïa kane ka prokram la kyrshan lang da ka tnat ïalehkai jong ka Sorkar Jylla.
Kumba ka paw ki khynnah kiba la wan sha kane ka jingpyrshang ki la don haduh 55 ngut.
Ha kawei pat ka liang ka synjuk ka la pynpaw ka jingai khublei ïa u Commandant ka 58 Gorkha Training Centre, uba la shah sngewbha ia ki dkhot ka Synjuk ban pyndonkam ïa ka climbing wall kaba dangshu dep tei thymmai na ka bynta katei ka prokram ai jinghikai.
