Chandigarh, Risaw:
U Myntri Rangbah ka Punjab u Bhagwant Mann ha ka Sngi Palei u la ong ba wat shisien jaw ka um yn ym sam lang bad kiwei pat ki jylla la ka long kumno kumno ruh. U Mann u la ong ïa kane hadien ba la dep ban pynlong ïa ka jingïalang ba kyrkieh jong ka Kynhun Myntri ha ka jaka sah jong u ha Chattisgarh. Naba ym don mat ïakren ban wanrah ha ka jingïalang, ka kynhun jong ki Myntri ka la ïakren noh halor ka mat ba ïadei bad ka Sutlej-Yamuna-Link (SYL) Canal.
U Mann u la ong ruh ba ïa ka kyrteng jong u Gurminder Singh la pdiang na ka bynta ka Post AG ha kane ka jingïalang jong ka Kynhun Myntri. Kane ka jingïalang ka la long shisngi hadien ba ka Supreme Court ka la hukum ïa ka sorkar kmie ba ka la dei ban khmih bniah ïa ki bynta jong ki jaka ha Punjab kiba dei ban shah mang na ka bynta ban shna ïa ka bynta jong ka SYL Canal.
Baroh ki seng saiñ pyrthei ha Punjab ki la ïai ban da kaba ong ba ka jylla kan ym ailad ba tang shisien jaw ka um ruh kan leit ne yn sam sha kiwei pat ki jylla. Ha kaba ïadei bad kane, ki seng saiñ pyrthei ha Haryana ki la pdiang ïa ki hukum jong ka ïingbishar bahakhliehduh, kaba la ong ba ki briew jong ka jylla ki la ïai ap khmih lynti ban ïoh ïa ka um na ka SYL da ki snem.
