Shillong, Risaw 06
Kan dei ka sien kaba nyngkong eh ba ka India kan thaw ïa ka khana pateng (history) da kaba ïoh khur takma ha ka Asian Games lyngba ka kynhun ki ‘thei ïalehkai ha ka jingïalehkai sepaktakraw.
Ha kane ka sngi ka kynhun ki ‘thei ïalehkai ka ri (women’s regu team) ka la lah ban khur ïa ka takma rnong hadien ba shah rem noh ha ka semi final, wat la kan ïakynduh ïa ka kynhun kaba na Thailand.
Kane ka kynhun ïalehkai ka ri ka kynthup ïa ka Ayekpam Maipak Devi, Oinam Chaoba Devi, Khushbu, Elangbam Priya Devi bad ka Elangbam Leirentombi Devi, kiba la lah ban pyni ïa la ki sap ïalehkai hashwa ba kan shah rem noh da 10-21, 13-21 ha ka semi final.
Ka Thailand, kaba long ka lahduh ha kane ka jingïalehkai, ka la lah ban pyni ïa ka jingkhlaiñ ia ka liang pyrshah. Ha ka jingïalehkai jong ka sepaktakraw, baroh ar ki kynhun kiba la rung sha ka semi final ki la ïohpdiang ïa ka takma rnong.
Kumba ka paw kane ka long ka sien kaba nyngkong eh ba ka kynhun ki ‘thei ïalehkai ka ri ka la lah ban khur takma nyngkong eh ha ka Asian Games, bad kan dei ka takma kaba ar na ka bynta ka ri ha kane ka jingïalehkai hadien ba kynhun jong ki shynrang (men’s regu team) kala khur ïa ka takma rnong ha ka Asian Games jong u snem 2018.
