Shillong, Risaw 08
U KL Rahul bad u Virat Kohli ki la tyngshaiñ na ka bynta ka India, ha kaba ki la lah ban lam lynti ïa ka kynhun sha ka jingjop ha ka jingïalehkai sdang jong ka lympung World Cup 2023 pyrshah ïa ka Australia kaba la long ha MA Chidambaram Stadium ha Chennai.
Haba phai sha ka jingïalehkai, ka Australia kaba la jop ka jingkynting pisa ka la kam trai ban tied nyngkong hynrei kam shym la lah ban shan hakhmat ki nongkawang bol ka India, ha kaba ka la lah ban kamai tang 199 run na ki 49.3 over bad hap lut ki wiket.
U Steven Smith u la tied 46 run, u David Warner u la tied 41 run bad u Mitchell Starc 28 run katba na ka liang ka India u Ravindra Jadeja u la khur 3 wiket, u Jasprit Bumrah bad Kuldeep Yadav ki la ïoh mar 2 wiket.
Haba beh ïa kane ka thong kaba rit, ka India kam shym la ïoh satia ka jingsdang kaba paka hynrei ban duh noh ka wiket jong u Rohit Sharma, Ishan Kishan bad Shreyas Iyer ha ka por ba ka dang kamai tang 2 run bad kane ka la ai mynsiem ïa ka Australia hynrei ka jinglah ban ïalehkai bha da u KL Rahul bad Virat Kohli kiba la lah ban pynneh ka wiket bad kamai run suki suki haduh ba ki la lah ban tied 165 hapdeng jong ki, ka la lam lynti ïa ka India sha ka jingjop, watla ka India ka la duh noh ïa ka wiket jong u Kohli hadien ba ka la kamai 167 run.
