New Delhi, Risaw:
Ka jingshahkem jong u heh nongïalam jong ka seng AAP bad u MP jong ka Rajya Sabha u Sanjay Singh ha ka kynhun Enforcement Directorate halor ka jingshah kynnoh don bynta ha ka jingjia kaba la mih na ka jingpyndkoh treikam ha ka tnat Excise ha ka sngi Balang ka la nang pynsniew shuh shuh ïa ka jingïapher jingmut ha ka kam saiñ pyrthei hapdeng ka seng BJP bad ki seng ka liang pyrshah.
Wat lada ka seng Congress kam pynpaw paidbah halor kane, u nongïalam jong ka u Abhishek Singhvi ha ka jingïakren bad ki nongthoh khubor u la ong: “Ka la paw shai ba ka dei ka jingkem beaiñ. Kaba donkam mynta ka long ban ïatylli bad ban wad ki lad ki lynti ban ïakhun pyrshah halor ka jingbteng jong ka jingpyndonkam bakla ïa ki kynhun tohkit.”
Kiba bun ki seng jong ka kynhun synrop INDIA ki la kynthoh jur ïa ka sorkar. Katba u Myntri Rangbah jong ka Delhi bad u nongai jingmut jong ka seng AAP u Arvind Kejriwal u la ong ba kane ka jingkem ïa u Singh ka long kaba beaiñ, u Symbud Myntri Rangbah jong ka Bihar u Tejashwi Yadav u la ong ba ka BJP u la buh jingeh ïa ki seng riewlum kiba trei hok ïa ka kam.
U heh nongïalam jong ka seng TMC u Derek O’Brien u la ong “Ka kynhun ED kam shym treikam ha ki jylla bym synshar da ka BJP.”
“Ka jingshahkem jong u Sanjay Singh ka long kaba beaiñ. Kane ka pyni ba u Modi u dap da ka jingtieng jingsyier. Kin sa kem shuh shuh ïa ki nongïalam jong ka liang pyrshah haduh ban da sdang ka ilekshon,” la ong shuh shuh u Kejriwal.
