Shillong, Risaw 08
Ka Sngap Syiem College ha ka liang ki shynrang bad ka Shillong College ha ka liang ki kynthei ki la ïoh rah ïa ka nam Overall Champion ha ka NEHU Inter College Cross Country Men & Women Championship 2023 kaba la pynlong ha ka sngi Saitjaiñ.
Ïa kane ka jingïamareh la pynlong bad pynïaid da ka Sports Department jong ka North Eastern Hill University ha Shillong NEHU Permanent Campus, Shillong.
Haba phai sha ka jingïamareh ha ka NEHU Inter College Cross Country Women Championship 2023, ka Shillong College ka la khur ïa ka nam Overall Champion katba ka Sngap Syiem College ka la wan ba-ar. Haba phai pat ha ka NEHU Inter College Cross Country Men Championship 2023, ka Sngap Syiem College, Mawkyrwat ka la khur ïa ka nam Overall Champion katba ka Shillong College ka la wan ba-ar.
Ka jingpynlong ïa kane ka jingïakop da ka Sports Department jong ka NEHU ka long na ka bynta ki samla pule jong ka University bad ki college kiba la pynïasoh bad ka, ki nonghikai bad ki bym dei ki nonghikai ruh kumjuh jong kane ka skulbah.
Ha kane ka jingïakop baroh kiba la ïashim bynta ki la kot sha ka 125 ngut ba kynthup ïa ki samla pule, ki nonghikai bad kiwei kiwei.
Ïa kane ka sngi la pynkut bad pynhap pyrda da u Prof B Panda, uba long u Finance Officer I/C ka NEHU kum u kongsan, ha kaba u la aiti ïa ki memento bad trophy sha ki nongjop. La sakhi lang ïa kane ka sngi da ki nonghikai ba kynthup ïa u N Das, uba dei u Assistant Director (PE & Sports) cum Organising Secretary bad ki Non Teaching Staff jong kane ka skulbah bad kiwei kiwei.
