Shillong, Risaw 08
Ka Mylliem Lum Sports Club bad ka Lawmali Pyllun Sports Club ki la khur ïa ka jingjop ha ki jingïalehkai jong ka lympung SSA SRGT 3rd Division Football League 2023 ba la pynïaid da ka Shillong Sports Association (SSA) ba la pynlong ha madan Third Ground MFA Turf, Polo.
Haba phai sha ka jingïalehkai ba nyngkong kaba la long ha ka por 3 baje janmiet, ka Mylliem Lum SC ka la lah ban pynliem noh ïa ka Mawpat Sports Club da 1-0 kol. ïa kane ka shi kol la ïoh ban thep da u Lesterwell Khyriem ha ka minit ba 40.
Haba phai pat sha ka jingïaleh-kai kaba ar jong kane ka sngi, kaba la long ha ka por 5 baje janmiet, ka Lawmali Pyllun Sports Club ka la lah ban pynliem noh ïa ka Nongumlong Sports Club da 3-2 kol ha ka jingïalehkai kaba ïakhaid bad itynnad bha hapdeng baroh ar liang.
Ha kane ka jingïalehkai, dei ka Lawmali kaba la ïoh ban khyrwit ïa ka kol kaba nyngkong kata lyngba u Richmon Buam ha ka minit kaba 23 hynrei shwa ban wai ka kylla step, ka Nongumlong lyngba u Graffenberg N Doloi ka la ïoh ban pynphai noh ïa kane ka shi kol ha ka minit ba 45.
Haba bteng ïa ka kylla miet, ka Lawmali ka la ïoh thep ïa ka kol kaba ar ha ka minit kaba 55 lyngba u Banganson Nongphlang hynrei ha ka minit kaba 73 kata sa shisien ka Nongumlong ka la ïoh ban pynïakhaid biang lyngba ka kol u Lastborn Nongbri bad katba ka jingïakhun ka dang ïakhaid bha, u Richmon Buam u la ïoh ban thep syndon ïa ka kol kaba lai jong ka Lawmali bad kaba ar ka jong u, kaba la dei ruh syndon ka kol jong ka jingjop.
Lashai ka sngi ka 9 tarik pat ka jingïakhun ha kane ka Division kan long hapdeng ka Rynjah Sports Club pyrshah ïa ka Tynring Sports Club ha ka por 5 baje janmiet.
