Moscow, Risaw:
U President ka Russia, u Vladimir Putin ha ka Sngi Palei u la pynbna halor ka jingseisoh ka Russia ha ka jingpyrshang pynbthei ia u ‘namding Nuclear ‘Burevestnik’, uba ka Russia kam pat ju pyrshang pynbthei ha kine ki 30 snem mynta.
Kumta, u Putin u la ong ba ha ka sien ba nyngkong, ka jingtrei shitom bad ka jingpyrshang jong ka Russia ka la long kaba jop bad la ngeit ba une u ‘namding un synshar ha kane ka thma pyrshah ia ka Ukraine.
Ha kajuh ka por ruh, haba iakren bad ki lad pathai khubor, u Putin u la iathuh ba ka Russia ka la jan dep artad ia ka jingpynbit pynbiang ia u ‘namding ‘Sarmat Intercontinental Ballistic Missile’ bad uba long uwei na ki ‘namding Nuclear uba khlaiñ tam ha kane ka juk.
Shuh shuh ruh utei u nongialam jong ka Russia, u la ong ba wat la ka thma ka la iaid mynta la shi snem shiteng tam, hynrei ym don ba nud ban sdang ne wanrah ia ka thma ‘Nuclear’ bad lada dei ba ki don kiba nud ruh, u la ong ba ka Russia ka don da ki spah- hajar tylli ki ‘namding Nuclear kiba khlaiñ bor bad ka sahit bneng kan dap da ki spah tylli ki ‘namding ka Russia ha kata ka por lada kata kan wan jia ne urlong.
Namar la ong ba ka Russia kam pat ju pyrshang pynbthei ia uwei ruh u ‘namding Nuclear jongka naduh u snem 1990 tad haduh kane ka kynti. Hynrei dei tang ha katei ka sngi ba ka Russia ka la lah ban iohi ia u soh ka jingtrei shitom jongka baroh shi katta bad ka la iohi ruh ia ka bor jong utei u ‘namding Nuclear uba ka la buh bad pynap baroh shi katta.
