Kyiv, Risaw:
U President ka Ukraine, u Volodymyr Zelensky ha ka Sngi Thohdieng u la maham ba ka Russia ha kane ka sien mynta, kan sa ialeh ban ther ‘namding bad ban pynjulor ia ki shlem pynmih bor ding jong ka Ukraine. Namarkata, u la ong ba ka long kaba donkam ia ka Ukraine ba kan ialeh ban iada lypa ia ki thaiñ ba don kitei ki shlem pynmih bor ding khnang ban lait na ki jingduh nong hadien habud.
Namar la ong ba ka Ukraine ka la sheptieng lypa ioh kitei ki shlem pynmih bor ding jongka kin shah pynjulor ha ka Russia khamtam haba ka Tlang ka la jan wan.
Ha ka Tlang ba la leit, ka Russia ka la ialeh katba lah ban pynjulor ia baroh ki shlem pynmih bor ding jong ka Ukraine, ha kaba bun tylli ki nongbah jong ka Ukraine ki la hap ban shong dum khlem ka bor ding bad ki paidbah jong kitei ki nongbah ki la hap ban shong dum bad mad ia ka jingkhriat ha katei ka Tlang baroh shi Tlang.
Kumta, ha kane ka kynti ruh u Zelensky u la pynkynmaw bad maham biang ba ka Russia, kan sa siat dusmon khnang bad kan pynjulor ia ki shlem pynmih bor ding jong ka Ukraine khnang ban pynsajia ia ka Ukraine.
Hynrei, u la ong ba ka Ukraine ha kane ka por, ka la pynkhreh bha halor kane bad kan ym ailad shuh ia ka Russia ba kan ioh ban leh kput biang ia ka Ukraine kumba la long ha u snem ba la leit.
Shuh shuh ruh u Zelensky u la iathuh ba ki Myntr Sorkar jong ka Ukraine, ki la ioh ban shong jingialang bad ban iakren halor ki lad jingiada ban pynkhlaiñ ia ka jing pahara bad ka jingiada ia kitei ki shlem treikam jong ka Ukraine.
Namar u la ong ruh ba ka Ukraine kan ialeh katba lah ban pyntikna ia ka jingshngaiñ bad ka jingpynsuk naka bynta ki paidbah nongshong shnong jongka, kam pher watla ka don hapdeng ka thma kaba jur pyrshah ia ka Russia.
