Shillong, Risaw 08
U Jude Bellingham u la ïai bteng ban pynpaw ïa la ka sap kaba tbit bad ka jingsdang kaba paka tam ha ka jingim ïalehkai jong u hapoh ka Real Madrid da kaba u la ïoh ban khyrwit biang haduh ar kol ban pynlong ïa ka Madrid ban jop suk ïa ka Osasuna ha la ïing ha ka lympung La Liga.
U Bellingham ba dang 20 snem ka rta, u la dep ban khyrwit haduh 10 tylli ki kol ha ki 10 tylli ki jingïalehkai na ka bynta ka Real Madrid ha baroh ki lympung bapher bapher kiba u la mihkhmat.
Haba phai sha ka jingïalehkai, ka Real Madrid lyngba u Bellingham ka la ïoh ban khyrwit ïa ka kol kaba nyngkong ha ka minit kaba 9 bad ban tam da 1-0 kol haduh ba kut ka kylla step.
Haba bteng ïa ka kylla miet, ha ka minit kaba 54 u Bellingham u la ïoh thep sa ïa ka kol kaba ar bad hadien kane u Vinicius Junior ha ka minit kaba 65 u la thep ka kol kaba lai bad u Joselu ha ka minit kaba 70 u la thep ka kol kaba saw ban pynlong ïa ka Real Madrid ban jop da 4-0 kol.
