Ranchi, Risaw:
Kum shi bynta ban ïai ban halor ka jingong ba ki lehnoh Maoist ki la poi ha ka bynta ba kin sa duh sa dam noh ha Jharkhand, u Myntri Rangbah jong ka jylla u Hemant Soren ha ka por ba la don ka jingïalang ba la pynïaid da u Myntri ka tnat ki kam pohïing jong ka sorkar kmie u Amit Shah ha New Delhi ha ka sngi Thohdieng, u la kyntu ïa ka sorkar kmie ba ka la dei ban bteng ha ka ban ai ka jingkyrshan khnang ba yn lah ban rat dyngkhong ïa ki lehnoh na ka jylla.
“Ki lehnoh Maoist ki la sdang ban duhjait ha Jharkhand, khnang ban lah ban khanglad ïa ki ban nang pynkhlaiñ shuh shuh sa shisien ne ban pynkhie-im biang ïa ka kynhun, ki shipai sorkar ki la dei ban nang bteng ha ka ban pynkhlaiñ ïa ki jingleit thwet lehnoh ha ka jylla,” la ong u Myntri Rangbah.
Ïa ka samoi treikam jong u IG, jong ka CRPF ha ka jylla la dei ban nang pynjlan shuh shuh sa na ka bynta ki 3 snem, u la bynrap.
Shuh shuh la bynrap ba ka jingpynlong Campaign ban ïakhun pyrshah ïa ki lehnoh Maoist la pynlong ha ka jylla; u Soren u la ong ba la don ruh ka jingtrei shitom khnang ban jop bad pynïoh jingshaniah ïa ki nongshong shnong ha ki thaiñ nongkyndong da kaba pynlong ki jingïakren bad ïamir jingmut bad ki hapoh ka kynhun ba la pynïaid ïa ka prokram ha ki thaiñ ba la shah ktah jur ha ki lehnoh Maoist.
