Shillong, Risaw 08
Ki ‘thei ïalehkai kriket ka Meghalaya ki la shah pynliem kput noh ha ki ‘thei ïalehkai jong ka Vidarbha ha ka sngi sdang ïa ka lympung Women’s U-19 One Day Trophy kaba la long ha Surat ha ka Sngi U Blei.
Ha kane ka jingïalehkai kaba nyngkong ki ‘thei ïalehkai ki la shah pynliem kput ha ki ‘thei ïalehkai jong ka Vidarbha, kata ban shah pynliem noh da 10 wiket, hadien ba ka thong ka la long kaba rit bha na ka bynta ki ‘thei ka Vidarbha.
Hadien ba shah bthah ban tied nyngkong hadien ka jingshah liem noh ha ka jingkynting pisa, ki nongtied ka Meghalaya ki la lah ban kamai tang 32 run na ki 21.5 tylli ki over ne 131 tylli ki bol bad hap lut baroh ki wiket.
Na ka liang jong ki ‘thei ka Vidarbha khlem da hap wat tang shi wiket, ki la lah ban kot ïa kane ka thong tang ha ka over kaba long 4.2 ne ban kamai 33 run tang na ki 26 tylli ki bol.
Hadien kane ka jingshah liem kaba heh, mynta pat ki ‘thei ïalehkai ka Meghalaya kin pynkhreh pat ban ïakhun pyrshah ïa ka Pondicherry ka ban long ha ka sngi Ba-ar.
