Shillong, Risaw 08
Ki 27 ngut ki nongleit pilkrim na Meghalaya lem bad u Dr. W.R. Kharlukhi, MP ka Rajya Sabha na Meghalaya, mynta ki la lait na ka jingma, bad ki la ïoh ban jam sha shiliang khappud na Bethlehem, Jerusalem sha Egypt.
Ka Indian Embassy ha Ramallah, ha ryngkat ka jingïasnohktilang bad ka Embassy ka India ha Cairo, ka la pyntikna ba kine ki nong India ki la ïoh ban jam shngaiñ sha shiliang.
Ïa mynta ki dang don ha lynti sha Taba bad kin leit pat sha Cairo ha shuwa ban wanphai, hadien ka jingleit jngoh jong ki ïa ka Egypt.
U Myntri Rangbah ka Jylla, u Conrad K. Sangma haba pynsngew halor katei ka bynta, u la ong, “Kane ka jingpynkynriah kaba seisoh ka la urlong lyngba ki jingminot jong ka tnad kam bar-ri ka Sorkar Pdeng bad ka Indian Diplomatic Mission. Ki nongshong shnong ka Meghalaya, kiba la sahkut hapdeng ki jingkynad kiba jur jong ka Israel-Palestine, mynta ki la poi suk poi saiñ sha Egypt.”
Shuh shuh u la bynrap, “Ngi la sngew suk mynsiem ban tip ba ki ophisar ki la pyntikna ba ki la poi ha Egypt, kaba pyntikna ïa ka jingmanbha jong ki nongshong shnong jong ngi. Ki jingduwai jong ngi ki ïai bteng ban don bad ki ha ka leit ka wan jong ki haduh ba kin da wanphai sha la ïing.”
Kum ban shu kdew hangne, ka pyrthei baroh kawei ka la kyndit thret ha ka Sngi Saitjaiñ hadien ba ki dur khih bad ki dur ki la saphriang halor ka jingleit hiar thma ba kyndit kynsan jong ka kynhun Hamas na Palestine ïa ka Israel.
Nalor ba ki dkhot ka Hamas, kaba la shah kheiñ kum ka kynhun pyntriem, ki la leit rung sha ki ïing ki sem bad ki len shipai jong ka Israel, ka la ther ruh da ki ‘nam ding kumba 5,000 tylli ban pynjulor ïa ki ïing ki sem bad kiwei ki jaka ha Israel.
Halor kane, u Myntri Rangbahduh ka Israel, u Benjamin Netanyahu, u la ong ba ka Israel ka don hapdeng ka thma naduh ba ki lehnoh ki la thombor na ka liang ka Gaza Strip.
Ka Indian Embassy ha Israel ha ka Sngi Saitjaiñ ka la kyrpad ïa baroh ki nong India ha katei ka ri ban long kiba peitngor bad ban bud ïa ki kyndon ba la buh na bynta ka jingshngaiñ namar ka jingïakynad hapdeng ka Israel bad ka Palestine.
Ka jingïather hapdeng ka Israel bad ka kynhun Hamas na Palestine ka la rung sha ka sngi ba ar ha ka Sngi U Blei. Katkum ki khubor, palat 600 ngut ki briew ki ïap ha Israel bad 413 ngut ha Gaza naduh ba ka jingïakhun ka la sdang ha ka step jong ka Sngi Saitjaiñ hadien ba ki lehnoh Hamas ki la wan thombor ïa ka Israel.
Na ka liang ka tnat ka koit ka khiah jong ka Israel ha ka Sngi U Blei ka la pyntip ba kumba 2,048 ngut ki briew ki la mynsaw bad napdeng kine, 20 ngut ki don hapdeng ka jingshitom kaba jur. Nalorkata, ha ka thaiñ Gaza, ki la don ruh kumba 2,300 ngut kiba la mynsaw.
