U Nongsaiñ Hima, 1969
Nalor ka jingieid ïa la u Nongbuh Nongthaw bad nalor ka jingpynsan pynbha ïa la ka long rynieng bad la ka long ïing la jong, dang don shuh sa kawei kaei kaei kaba don kam kaba u briew u dei ban leh bad kata ka long ban ieid ne um treh ban aiti ïa lade na ka bynta ka ri, hynrei haba peit bunsien na ki jingiaid kiei kiei ha kane ka ri Khasi Jaintia jong ngi, ka ju paw ba ngi ju klet teng teng ia kane ka bynta jong ka jingthmu jong ka jingwan bad jingim jong ngi sha kane ka pyrthei.
Haba ong ban ieid bad ban aiti na ka bynta la ka ri ym mut ban dei ban shu shah iap kum ka blang ka masi khlem sngewthuh khlem khan bha, kiba mut ban ong hangne ka long ba khlem da iap ruh lah ban ieid ia la ka rid a kaba ngin kynmaw dngong ia la ka ri ha man la ki kyllipmat jong ka jingim jong ngi. Ha baroh ki jingtrei jingktah wa la kaba rit eh ba ngi trei ban kyndoi jakpoh ne ki jingkren ne ki jingiaid jingieng jong ngi, ngi dei ban aiti na ka bynta la ka ri.
U ne ka khynnah skul ki dei ban pule ban stad na ka bynta ka burom ka ri. Ki khynnah leit bylla ne ki khynah shongïing ki dei ban lah la ka kamram ym tang na ka jingmyntoi shimet hynrei ki dei ban trei bad ban pule na ka bynta ka burom ka ri.
Kumjuh ki long kmie longkpa jong ngi kiba leit iew leit hat ne kiba shnong iing, kito kiba trei ba ktah la ha kano kano ka rukom ki dei, nalor ba ki kamai ban pyndap ia la ka iing ka sem, ki dei ruh ban buh jingmut ba ki leh kumta ym tang na ka bynta ka jingmyntoi ne jingbit shimet hynrei ba ki trei ne leh kumta na ka bynta ka ri.Kumjuh ruh ki samla kynthei bad shynrang kiba don ha kano kano ka jingtrei ki dei ban kynmaw dngong ba ki im ha ka Mynta na ka bynta ka lashai jong ka ri.
Khadduh khadwai, kane ruh ka ktah ïa ki nongsaiñ pyrthei bad ki nongsynshar ka ri ba ki dei ban buh jingmut ba kano kano kaba ki leh ne ki trei kan long na ka bynta ka jingmyntoi la ka ri.Ka ri jong ngi ka don hapdeng shibun ki jingeh bad lada ngim sumar bad phukir khlem pep ngin shu jah rngai bad ngam jyllop ha ka duriaw ki bun paid namar ba ngi dei tang ki rit paid – shi troh ha ka shi byrni u khaw.
Ka khyndew ka shyiap ka khlaw ka btap ha ka ri ki la nang jah rngi bad teng teng ngi la thap klet ïa la ki dustur ba rim ba jah bad wei haba ngi la klet ïa la ka jong ka tynrai bad nongrim khlem pep ngin shu sah ha suiñ bad ngin pra ngin duh ngin dam kum ki palong ha ka lyer. To ngin ïa kynmaw dngong.
Ban im namar ka ri
Ha ki kam jong ngi
Kiba man la ka sngi
