Bangkok, Risaw:
Katkum ki khubor la ong ba ki bahaiing jong u khynnah 14 snem uba synreit kuli ia 2 ngut ki briew ha ka jaka iadie- iathied hapoh Bangkok, ha ka Sngi Thohdieng pat kitei ki bahaiing ki la pan map halor ka jingleh palat jong u khun jongki.
Ki pulit jong ka Bangkok ki la pynngat kyndon ia utei u khynnah u bym shym la pynpaw kyrteng, bad la pynngat ia u hapoh ki kyndon pynkheiñ aiñ jong ka jingpyniap briew. Katei ka jingjia ka la jia hapoh ka Siam Paragon Mall, ha kaba kitei ki 2 ngut kiba shah siat ha utei u khynnah 14 snem ki la khlad noh syndon. Katba 5 ngut kiwei pat ki la mynsaw.
Kumjuh ruh na ka liang jong u Myntri Rangbahduh ka Thailand, u Srettha Thavisin, u la kular ban shim khia halor kane ka jingjia bad ka jur jong ki jingjia synreit kuli hapoh ka ri bad kumjuh ruh u la kular ban pynshitom ia kito kiba don kti ha kum kitei ki jingjia bad yn pynngat ruh ia ki hapoh ki kyndon pynkheiñ aiñ kiba iadei bad ka jingleh pynkheiñ aiñ jongki hi. Kumjuh ruh na ka liang ka tnat kam bar ri jong ka Thailand, ka la phah ia ka kyrwoh sngewlem sha ki bahaiing hasem jong kitei kiba khlad bad pan map ruh ba kim lah ban ai ka jingiada kaba kloi ha katei ka jingjia.
