Nongstoiñ, Risaw 08
Ka Mawsnapwir Sport Club (MSC) ha ka sngi Saitjaiñ jong ka taïew ka la ïoh ban pynhap pyrda noh ïa ka lympung ïalehkai phutbol kaba la tip kum ka Under-15 Knock Out Football Tournament 2023 ha kaba ka kynhun ïalehkai jong ka Tyllang Junior Sports Club ka la ïoh ban rah ka nam lahduh.
Ka nam tam jong ka Tyllang Junior ka la wan hadien ka lah ban pynliem noh ïa ka Mawthungkper Sports Club da 3-1 kol kaba la wan lyngba ka jingshut tie-breaker hadien ba ka jingïalehkai ka la kut noh ha ka jingïakhaid da mar shi kol ha ka jingïalehkai final kaba la long ha madan Makrein, Mawsnapwir ha West Khasi Hills.
Ha katei ka lympung ïalehkai phutbol ki la don haduh 22 tylli ki kynhun ne ki club kiba la wan ban ïa shim bynta na kylleng ki jaka jong katei ka thaiñ.
Ha katei ka sngi pynhap pyrda ïa katei katei ka lympung, u Samla Lumlang Kharsyiemlieh uba long u President ka HYC West khasi Hills District u la ïadon lang kum u kongsan, ha ka jingdonlang ki nongkitkam ka Mawsngapwir Sports Club bad kiwei kiwei kiba la sam ruh ïa ki khusnam.
U kongsan haba kren ha katei ka sngi u la kyntu ïa ki samla ïalehkai da kaba ong, “Wat klet ïa la ka jinglong Khristan haba phi don hapoh madan, kata kan kyntiew ïa phi bad ïa ka sap jong phi.”
