Patna, Risaw:
U Myntri jong ka sorkar kmie u Jyotiraditya Scindia u la kynthoh jur ïa ka seng Congress, ha kaba la kynnoh ba kam shym la leh ei ei na ka bynta ki kynhun kiba dang sahdien ha ki 70 snem jong ka jingsynshar jong ka, bad pynshisha ba ka la long pyrshah ïa ka jingmang bakyrpang na ka bynta ki briew jong kane ka kynhun.
U Myntri ka Civil Aviation u la pynshisha ïa kane ha ka jingïakren bad ki nongthoh khubor ha Gwalior ha ka sngi Thohdieng.
Kane ka jingkren jong u ka la long ha ka por ba don ka ‘Jitni abaadi, utna haq” kiba long ki jingpyntreikam ban wad bniah halor ka jingdon jong ki kynhun jait bynriew bad ban pynïoh ïa ka hok ba dei ban mang kumba la pynbna da u nongïalam jong ka seng Congress u Rahul Gandhi hadien ba la phah ïa ka kaiphot halor ka jingdon jong ki kynhun jaitbynriew ba la wanrah da ka sorkar Bihar, ha kaba la paw ba ka kynhun Extremely Backward Classes bad Other Backward Classes ki la don da kumba 63 per cent na ka jingbun paid ha ka jylla.
Kum shi bynta ban ai ïa ka jubab halor ka jingkylli halor ka jingwad khana samari halor ka jingdon jong ki kynhun jait bynriew ha Bihar bad ka jingkren jong ka seng Congress halor jong ka, u Scindia u la ong, “Kane ka seng (Congress) kam shym leh ei ei na ka bynta ki kynhun ba dang sahdien ha ki 70 snem.”
“Haba ïa ka kaiphot jong ka Commission (halor ki kynhun ba dang sahdien) la dep ban phah ha ka por ba la synshar u Myntri Rangbahduh barim u Morarji Desai, ka seng Congress ka la pyrshah halor jong ka. Haba ka sorkar ba la lamkhmat da u V P Singh ka la pyntreikam da ka jingmang bakyrpang na ka bynta ki kynhun ba dang sahdien, ka seng Congress ka la pyrshah halor jong ka ruh,” la ong u Scindia.
