Geneva, Risaw:
Ka United Nations High Commissioner for Human Rights (OHCHR) ha ka Sngi Thohdieng ka la phah ia ka kynhun ba kyrpang ban leit wad bniah halor ka jingshah ther ‘namding jong ka Ukraine ha ka shnong Hroza, ha kaba 52 ngut ki briew ki la khlad ha katei ka jingbthei jong utei u ‘namding ba la siat da ka Russia.
Ha katei ka jingjia, la ong ba uwei u ‘namding uba khlaiñ bor u la leit hap bad bthei ha ka ïingmala kaba long ka jaka iadie- iathied kaba don ha katei ka shnong bad ka long ruh ha katei ka por ba kitei ki briew ki dang leit ban ialum bad ban pyndon burom ia uwei u shipai ka Ukraine uba la khlad hapdeng ka thma.
U heh jong ka UN High Commissioner for Human Rights, u la pynrem jur ruh halor katei ka jingleh dusmon jong ka Russia, da kaba siat dusmon sha ki jaka ba shong ki riew paidbah bad khlem jingsalia ban shim ia ki mynsiem ba lui-lui ha katei ka jaka.
Katei ka nongbah ka la pynlong ia ka jingsngewlem kaba 3 sngi lynter ban pyndon burom khatduh bad ban leh burom ia kitei kiba khlad baroh, khamtam naba katei ka jingjia ka long kaba shyrkhei tam napdeng baroh ki jingther ‘namding dusmon jong ka Russia ha baroh shi katta.
Katba, na ka liang jong ka Russia, ka la kyntait beit man ka por ba kam shym la siat ne ther ‘namding sha ki jaka ba shong ki riew paidbah hynrei tang ha kito ki bynta ba don ki shipai jong ka Ukraine.
Ka jingleit wad bniah jong kane ka kynhun ka long ban tip tikna la utei u ‘namding uba leit bthei bad uba khlaiñ bor bha ha katei ka jingjia, u dei ne em u jong ka Russia. Hynrei la ong ba haba peit pat ia ka jaka ba utei u ‘namding u leit poi bad ki dak kiba paw la sngewthuh ba un dei beit u ‘namding jong ka Russia hi. Watla katta, la ong ba ka long kaba donkam ban wad bniah shuh shuh halor kane.
