Shillong, Risaw 08
Saw ngut ki nongjngi kiba kynthup ïa ar ngut ki kynthei bad ar ngut ki shynrang, ki la shah jied na ka bynta ban mihkhmat ïa ka Meghalaya ha ka lympung National Games kaba 37 ka ban long mynta ka kynti ha Goa.
Kine ki saw ngut ki nongjngi kiba la shah jied ki dei napoh ka shnong Shella. Ka kyrteng jong ki ka long ka Ilarisuk Youroi, Mebankitboklang Banai, Banpynshngain Syngwan bad Pdiangsuklang Syngwan.
Ïa kane la ïathuh da u Secretary ka Meghalaya Swimming Association u Bah Ian Lyngdoh haba ïakren bad ki kato katne ki nongthoh khubor ha Crinoline Swimming Pool, ha ka sngi Saitjaiñ, kaba dei artad ka sngi ba na ka liang ka MSA ka la pynlong ïa ka lympung ïakob jngi ba la tip ïa ka kum ka 16th State Aquatic Championship.
U Bah Ian u la pynpaw ruh ba na ka liang u Banpynshngain lei lei dang shen u la long uwei na ki nongjngi ba kynsai bha ha ka jylla hadien ba u la rah ïa ka nam nongjngi ba sted tam ne u ‘fastest swimmer’ ha ka jingïakob kaba u la leit ban ïahsim bynta dang shen sha Sikkim.
Kine ki saw ngut ki khynnah ka jylla kin khreh ban mih madan ban aireng ha ka ïakob jngi jong ka 50M freestyle, breasts troke, butterfly, bad breaskstroke.
U Bah Ian u la pyntip ba kine baroh saw ngut ki khynnah ki don por satang kumba 20 sngi ba kin pynkhreh janai bha ïalade ban leit ïakhun ha ka National Games, pynban kumba ka long ka jingpynthut ka la mih paw ïa ki namar ba kin don pat ki eksam ba kin hap ba kin ïaleh, ha kaba marsien dep ka eksam, u Bah Ian u la ong ba ka MSA kan khreh ba kan ai ïa ka jinghikai ne ka coaching ïa kine.
