Shillong, Risaw 09
Ka jingpynlong ïa ka lympung ïakop jngi ba la tip kum ka 16th State Aquatic Championship 2023 da ka Meghalaya Swimming Association (MSA) ka la long kaba jop ha kaba la sakhi ïa ka nongwan ïashim bynta ha ka sngi Saitjaiñ ha pung Crinoline.
Ha kane ka jingïakop la wan ïashim bynta da 116 ngut ki nongjngi kiba kynthup ïa 29 ngut ki kynthei bad 87 ngut ki shynrang. Kine ki nongjngi ki kynthup lang na kane ka nongbah Shillong, Shella, Umpung, Mawkyrwat ne wat naduh ri Lum Jaiñtia.
Ka kynhun kaba la ïoh ban khur bun tylli ki takma ksiar ka dei ka kynhun jong ka True North kaba la khur 26 tylli ki takma ksiar, 21 ki rupa bad 6 ki takma rnong. Ïa ka kyrdan ba-ar la bud sa ka Shella kaba la khur 14 ki takma ksiar, 12 ki rupa bad 8 ki rnong. Ïa ka kyrdan balai la ïoh da ka kynhun na Mawkyrwat kaba la khur 8 tylli ki takma ksiar, 14 ki rupa bad 12 ki takma rnong. Ïa ka kyrdan basaw la khur da ka Umpung kaba la ïoh kawei ka takma ksiar, mar ar tylli ki takma rupa bad rnong. Kiwei kiwei pat ba la wan ïashim bynta ki la khur mar 8 tylli ki takma ksiar bad rupa lem bad 12 ki takam rnong.
U Secretary ka MSA u Bah Ian Lyngdoh u la pynpaw ba ka jingwan ïashim bynta ki khynnah rit ka dei kaba ai jingkyrmen ïa ka synjuk, ha kaba u la ong ba ka daw ba pynlong ïa kum kane ka lympung ïakob ka long ruh ban plie lad ïa ki khynnah ba kin wan shakhmat ban pynpaw ïa ki sap kaba ki don bad ban pynpaw pyrthei ïa katta ka sap kaba ki don ha ki kyrdan iakhun jong ka regional ne wat haduh ka national level.
U la pyntip ruh ba lyngba kane ka jingïakop, ka MSA kan jied ruh ïa ki nongjngi kiba tbit bad ba kynsai ki ban mihkhmat ïa ka jylla ha ki lympung ïakop jong ka Junior bad ka Sub-Junior Nationals bad kumjuh ha kiba bun ki lympung ïakhun ban long ha ka thaiñ shatei lammihngi.
Shuh shuh u Bah Ian u la ïathuh ruh ba kumba ka long mynta, la sngew donkam ban don noh ka North East Swimming Forum, ha kaba ki jylla na kane ka thaiñ ba kin ïakhun hapdeng para ma ki.
U Bah Lyngdoh u la ban jur ba ïa mynta, ka Jylla ka la donkam ba kan don noh ïa ka pung jngi kaba pura (Olympic size), ha kaba kane kan pynlong ïa ki khynnah ka Jylla ba kin mlien ban jngi ha ka pung kaba 50M namar haba ki mih ban ïashim bynta sha ki jingïakob kiba long shabar hadien ba ki la dep ban jngi shwa kumba 25 meter la 25 meter kiba sah pat ki khynnah ka jylla ki hiar noh namar ba kim mlien ban jngi ha ki pung ba 50M.
Haba iadei bad ki coach, u Bah Ian u pynpaw ba ïa mynta ka jylla kam don ïa u coach ba pura, hynrei bunsien hap ban wan ïalam beit na shabar, hynrei u sngew pat ba kumba long ha kiwei kiwei ki jait jingïalehkai imat ka por ka la donkam ba ka Jylla kan don noh ïa u coach ban hikai jngi ba pura ha ka Jylla.
