Jowai, Risaw 09
Ka Moosalyngkat SC ka la khur ïa ka jingjop ha ka lympung ïalehkai 1st Division Football Tournament na ka bynta ka Chatister Kharkongor Memorial Trophy 2023 ba la pynïaid da ka West Jaiñtia District Sports Association (WJDSA).
Kane ka la wan hadien ba ka la pynjem khnap noh ïa ka Luti Tuber SW da 4-1 kol ha ka Lah Sngi U Blei ha Kiang Nangbah Studium kaba ha Ladthad-laboh, Jowai.
Ha kane ka jingïakhun baroh ar ki kynhun ki la pyrshang ban ïakhun tyng-eh naduh kaba sdang. Ka Moosalyngkat ka la ïoh ban pynkhih jar nyngkong eh ha ka minit kaba 25 lyngba u Datngen I Dan na ka bynta ban tam shi kol ha ka kylla step.
Hadien katto katne por ba la bteng ïa ka jingïakhun jong ka kylla miet ka Luti Tuber ka la lah ban pynphai kylla shi kol lyngba u Kordor Dkhar ha ka minit 55.
Da kane ka jingïakhaid ka la pynlong ïa kine ki kynhun ban ïai bteng ban ïakhun tyngeh, hynrei shwa ban wai u Edius L. Laloo u la ïoh ban thep ar kol ha ka minit kaba 80 & 89 bad ïa ka kol kaba khatduh la thep da u Lalthakhuna Ngaite ha ka minit 90+3 na ka bynta ban pynlong ïa ka Moosalyngkat ban khur syndon ïa ka jingjop.
Ka jingïalehkai ha ka sngi Ba-ar kan long hapdeng ka Nangbah Ïawmusiang pyrshah ïa ka Sabahmuswang ha ka por 2 baje nohphai sngi.
