Toronto, Risaw:
Katkum ki khubor la ong ba napdeng ki 3 ngut kiba khlad na ka jinghap bakla ka liengsuiñ rit hapoh British Columbia jong ka ri Canada, 2 ngut ki dei ki nongñiah ‘Pilot’ kiba dang don hapdeng ka jingshah hikai.
Kitei ki 2 ngut ki long u Abhay Gadru uba 25 snem ka rta na Mumbai bad u Yash Ramugade uba 25 snem hi ka rta bad baroh ar ngut la ong ba ki dei kiba na ka nongbah Mumbai. Kine nongñiah ki dei kiba dang don hapdeng ka jingshah hikai bad ki la duh noh la ka jingim hadien ba ka liengsuiñ ‘PA-34 Seneca’ ba ki shong ka la leit hap bakla noh ha ka Sngi Thohdieng hajan ka Kad Liengsuiñ jong ka nongbah Chilliwack, kumba 100 Kilometre na Vancouver.
La ong ba katei ka liengsuiñ ka la leit hap noh hashwa ban poi ha katei ka Kad Liengsuiñ, bad kaba la pynlong ïa kitei ki 3 ngut kiba kynthup ïa kitei ki nongñiah bad ïa utei uwei uba shong lang ha katei ka liengsuiñ rit ha katei ka sngi.
U Gadru u dang shu leit sah sha Canada dang ha kine ki 3 snem mynta bad u la leit ban shah hikai bad pyntbit ialade ha katei ka kam ‘Pilot’ bad u la dei ban dep ïa ka ‘Graduate’ ha une u Naiwieng u ban wan.
La ong ba u bakha jong u Gadru, uba ju ïa sah lang bad u Gadru hapoh British Columbia jong ka Canada, u la ialeh katba lah ban iarap pynpoi noh kloi ïa ka met jong u Gadru sha ki bahaiing- hasem bad sha ki kmie-kpa jong u kiba don hapoh India.
Kumjuh ruh la ong ba uwei pat uba ngat lang ha katei ka jingjia, u long u nong Mumbai hi uba la tip kyrteng u Yash Rumugude.
Hynrei ki lad pathai khubor ka Canada kim da ai jingtip shai eh shaphang u Yash hynrei ki la wad bniah kham bun ïa u Gadru.
Katkum ki jingthoh kiba dang lah ban paw bad pynithuh na ka tdong jong katei ka liengsuiñ, la iohi ba katei ka liengsuiñ ka dei ka Piper PA-34 Seneca kaba long trai da ka SkyQuest Aviation, ka long ruh ka liengsuiñ na ka jaka pule ki ‘Pilot’ na Langley bad la shem ba ïa katei ka liengsuiñ ka shna naduh u snem 1972.
Hynrei ki lad pathai khubor kim shym la lah ban pynpaw ïa ka kyrteng jong u nongñiah ‘Pilot’ u ba ñiah ïa katei ka liengsuiñ ha katei ka sngi bad ym pat lap ruh ïa ka daw ba balei katei ka liengsuiñ ka leit sangeh treikam ha katei ka sngi.
Ka tnat Transportation Safety Board jong ka Canada ka la iathuh ba ka dang phah ïa ki kynhun wad bniah ba kin leit ban peit thuh bad wad jingtip shai halor ka daw jong katei ka jingjia.
