Shillong, Risaw 10
Ka jingbym lah ban pyndep ïa ka jingmaramot ïa ka Jawaharlal Nehru Stadium ka la pynlong ïa ki bor pynïaid ka All India Football Federation (AIFF) ban jied ïa ka First Ground jong ka Shillong Sports Association ne ka SSA Stadium kum ka jaka ïalehkai ha la ïing (home matches) jong ka Shillong Lajong FC ha ka lympung ïalehkai I-League.
Kane ka long hadien shi bnai tam ba la pynsangeh ïa ka Shillong League 2023 (Fourth Division Football League) ba la pynïaid da ka Shillong Sports Association (SSA) na ka daw ba mih kynrum-kynram halor ka jingbym biang ki nala ban pyntuid ïa ka um ha kaba katei ka madan ka la dap um myn ha u Nailar mynta u snem na ka daw ka jingjur u slap tang kumba katto katne kynta.
Kat kum ka jingpyllait da ka AIFF ïa ki prokram ïalehkai I-League 2023-24, ka paw shai ba ka Lajong kam don lad shuh ban ïoh pynlong ïa ki jingïalehkai ha la ïing ha JN Stadium namar ka jingmaramot ban pynbha ka dangshim por ban pyndep watla na ka liang ka Sorkar Jylla ka la buh ïa ka thong ban pyndep shwa ban kut jong u snem.
Dangshen na ka liang u Myntri ka tnat ïalehkai ka Sorkar Jylla u Bah Shakliar Warjri u la pynpaw ba ïa ka jingmaramot yn pyndep ha ka taïew kaba khatduh u Naiwieng lane ka taïew ba nyngkong u Nohprah mynta u snem.
Ïa kane ka lympung yn sdang ha ka 28 tarik mynta u bnai, hynrei ka Lajong kan pynkhreh ïa ka jingïalehkai ha la ïing pyrshah ïa ka NEROCA FC ha ka 9 tarik u Naiwieng mynta u snem.
Kumba ka paw ïa ka SSA Stadium ym pat shym la lah ban pyndep pura ïa ka kata ki jaka khreh ki nongïalehkai, ki flood light bad kiwei.
