Kolkata, Risaw
Ka kynhun Central Bureau of Investigation (CBI) ha ka Lah Sngi U Blei ki la pynlong ïa ka jingleit khynra ha West Bengal ha kaba ïadei bad ka jingdon jong ka jingdkoh treikam halor ka jingthungkam ha Municipal.
Ha Sngi Ba-ar jong ka jingkhynra, ki heh jong ka kynhun CBI ki la pynlong shwa ïa ka jingleit khynra ha ki ïingsah jong u MLA ka seng BJP u Partha Sarathi Chatterjee ha Ranaghat bad ha ki san tylli kiwei pat ki jaka ha Nadia, Uluberia bad ha Diamond Harbour.
U Chatterjee u la long u shongknor barim jong ka Ranaghat Municipality.
Ka kynhun CBI ka la poi ban leit khynra ha ka ïingsah jong u ha ka por 9.45 mynstep. Kawei pat ka kynhun CBI ha ryngkat ka jingïatreilang bad ki shipai, ki la pynlong ïa ka jingleit khynra ha ka step jong ka Sngi U Blei ha ka ïingsah jong u Myntri ka Municipal jong ka West Bengal bad u Mayor jong ka Kolkata u Firhad Hakim.
Ha kane ka sngi ba la don ka jingleit khynra, la buh ïa ki jingker ha tawiar ki ïingsah jong u ha kaba ka long ka jingpyntreikam kaba hap hapoh ka jingshah pyrkhing.
Ha ka por ba la don ka jingpyntreikam, ïa ka jingkhynra la leh da ka kynhun toh-kit.
Kumjuh, ka kynhun CBI ka la pynlong ruh ïa ka jingleit khynra ha ka ïingsah jong u heh nongïalam jong ka seng Trinamool Congress u Madan Mitra. U Mitra u la long u MLA na Kamarhati.
Ka Kamarhati Municipality, napdeng kiwei pat, ïa mynta ka la hap hapoh ka jingshah tohkit halor ka jingshah kynnoh ba ka la don ka kam bamsap.
Ka kynhun Enforcement Directorate (ED) ha ka sngi Palei ka la pynlong ïa ka jingleit khynra ha ka ïingsah jong u Myntri ka tnat Food and Supplies jong ka West Bengal u Rathin Ghosh bad sha kumba 12 tylli ki jaka kiba don jingïadei bad ka jingjia jong ka kam bamsap kaba ka mih na ka jingthep kam ïa ki briew ha ki Civic Body ha kylleng ka jylla, la ïathuh shuh shuh ki heh ba dei khmih.
Ki dkhot jong ka kynhun ED ki la leit sha kylleng ki jaka kynthup ha North 24 Parganas distrik ha ka por kumba 6 baje mynstep bad sdang ban leit khynra ïa ki ïing bad ki jaka treikam jong ki heh sorkar kiba la shah kynnoh donkti ha ka kam bamsap ha ryngkat ka jingïarap jong ki shipai ka sorkar kmie ban leit sha kylleng ki jaka na ka bynta ka jingleit khynra kumba la mut ban pyntreikam.
Ka tyllong khubor ka la ïathuh ba ka kynhun tohkit jong ka sorkar kmie ka la leit ban pynlong ïa ka jingkhynra ha kumba 13 tylli ki jaka, kynthup ha ka ïingsah jong u Myntri ka tnat ki kam pohïing ha Michael Nagar kaba don ha North 24 Parganas distrik.
Kane ka dei ka sien kaba nyngkong ha kaba ki heh jong ka kynhun ED ki la sdang ban pynlong ïa ka jingleit khynra ha ki ïing jong ki Myntri kiba la shah kynnoh donkti ha ka kam bamsap.
Ha ka por ba ka la don ka jingleit khynra ha ka jaka treikam jong u nongïarap u Ayan Sil, ïa uba la shah kynnoh donkti ha kakam bamsap ha kaba ïadei bad ka jingthung kam nonghikai, ka kynhun CBI ka la pynshisha da kaba ong ba na ka jingkhmih bniah la shem ba ka la don ka jingdkoh treikam ha kaba ïadei bad ka jingthungkam ïa ki nonghikai.
