Beijing, Risaw:
Ki lad pathai khubor jong ka China, ha ka Sngi Nyngkong ki la pyntikna ba u nongkiew lum na America, u Anna Gutu bad u nong-ialam kiew lum u Mingmar Sherpa na Nepal, ki la khlad noh syndon hadien ka jingtwa u lum thah Tibetan, katba kitei 2 ngut ki dang pyrshang ban kiew ïa utei u lum thah ha ki khyndiat sngi ba la leit.
La ong ba kitei ki 2 ngut ki la jah rngai naduh ka por ba utei u lum ‘Mount Sishapangma’ u la twa ha ka Nohphai sngi jong ka Sngi Saitjaiñ jong kane ka taiew ba la lah na ka 7,600 (kumba 25,000 phut) bad 8,000 meter (kumba 26,000 phut) ka jingjrong.
Katba, kiwei pat ki 2 ngut ki nongkiew lum kiba kynthup ïa ka Gina Marie Rzucidlo bad u nongialam kiew Lum na Nepal u Tenjen Sherpa, ki la shu jah rngai kumto bad haduh mynta ym pat lap ksai shaei ki don bad kaei kaba la jia ïa ki.
La ong ba ki don kumba 52 ngut ki nongkiew lum na ki bapher jong ka pyrthei kynthup ïa kiba na United States, Britain, Japan bad na Italy kiba dang pyrshang ba leit kiew ïa utei u lum, ha kaba utei u lum u la twa noh.
Kumta, la ong ba ki bor pyniaid jong katei ka ri, ki la khang noh shipor ïa ka jingleit kiew sha utei u lum Shishapangma namar ka jingbym biang jong ka jinglong-jingman jong utei u lum thah bad ym lah ban tip tikna haduh katno un skhem bad ha kano ka por ruh un twa bad kitei ki thah kin um bad tuid ne twa kumba long ha katei ka jingjia.
U lum Shishapangma, u long u lum uba 14 napdeng ki lum thah kiba jrong tam ha ka pyrthei, kumba 8,027 meter lane 25,335 phut ka jingjrong jong u na sla duriaw.
Namar la ong ba ki nongkiew lum ki ju sngewtynnad bha ban leit kiew ïa ki lum Himalaya ha kine ki aiom bad khamtam haba la poi u Risaw, namar ka aiom slap ka la kut. Hynrei ki bor pyniaid bad ki riew shemphang ki la maham ba ka jingkylla jong ka suiñbneng ha une u snem ka lah ban wanrah ïa ka jingtwa kitei ki lum thah ha kano kano ruh ka por bad kumta kam long kaba shngaiñ ïa ki nongkiew lum ba kin leit kiew sha ki lum thah katba kim pat lah ban pyntikna ïa ka jinglong jingman jong kitei ki lum.
Shuh shuh ruh la ong ba ki la don kumba 120 ngut ki nongkiew lum kiba la duh ei noh ïa ka jingim jongki hapdeng ka jingleit kiew sha ki lum Himalaya jong ka India bad kiba la mad ïa kum kitei ki jingjia ha kine ki 2 snem ba la leit.
