Washington, Risaw:
Ha kane ka khubor la ong ba ka la wanrah ïa ka jingsngewkhia na ka liang ka tnat ka koit ka khiah jong ka United States, la ong ba kawei ka longkmie na US kaba dang pun-khun lyngba ka In Vitro Fertilization (IVF), ka la ioh dih bakla ïa ki dawai pynhap khun ha ka jaka ba kan ioh ïa ki dawai ban pynkhlaiñ bad pynbiang ïa ka koit ka khiah jong ka bad ki khun ba ka pun. Kumta, la ong baroh ar ngut ki khun synrap kiba ka dang pun ki la khlad noh tang namar katei ka jingbakla jong ki nongsumar ha ka por ba ka leit ban phah peit bad phah sumar.
Katei ka longkmie ba la tip kyrteng kum ka Tamika Thomas, haba iakren bad ki lad pathai khubor, ka la ïam kthang bad ong ruh ba kitei ki nongtrei jong katei ka jaka ai dawai ki la pyniap ïa ki khun jong ka baroh ar ngut.
Katkum ka jingiathuh jong katei ka longkmie, la ong ba katei ka longkmie ka dei ka bym lah shuh ban pun khun hi bad kumta ka la shu leit ban phah leh da ki rukom pun khun jong kane ka juk ba mynta ka ‘IVF’ bad ka daw ka long namar ba ka don jingthud ha ka met jongka naduh ba ka pun ïa ki khun kiba hashwa. Hynrei ma ka bad u kurim jongka ha u snem 2019, ki la kwah ban don ïa ka longiing kaba kham heh bad kumta ki kwah ban ioh khun biang bad dei na kane ka daw ba ka la leit ban phah leh ïa ka IVF.
Hynrei la ong ba hadien ba ka la leit sha North Las Vegas CVS ban leit thied ïa ki dawai ba la bthah da ki nongsumar, ki nongai dawai ha katei ka jaka die dawai pat ki la ai ïa ka da u ‘Misoprostol’ ba ju pyndonkam ha ka ban pynhap khun bad hadien ba ka la ioh dih ïa kitei ki dawai, katei ka longkmie ka sngewthuh ïa ka jingtyrha bad jingshitom ha ka kpoh jongka bad ynda la leit phah peit sha ka jaka sumar la shem ba ki khun jongka ki la khlad noh namar kitei ki dawai kiba ka la ioh dih bakla na katei ka dukan.
Hadien kane, ka la ujor da ka ejahar pyrshah ïa katei ka SVS Pharmacy halor ka jingtorti jong kitei ki nongtrei kiba la ai ïa ka da ki dawai kiba bakla bad kaba la pynlong ïa ka ban duh noh syndon ïa kitei ki khun kiba ka la lah ban pun hadien ba la leh ïa ka IVF.
Katkum ka jingwad bniah bad hadien ba la tohkit ïa kitei ki nongtrei, la ong ba ka daw jong katei ka jingbakla jongki ka long ba kim lah ban ithuh ïa ka dak doktor ba la thoh ha ka slip dawai ba katei ka longkmie ka leit rah sha katei ka pharmacy bad kumta ki la ai ïa ka da u ‘Misoprostol’ ha ka jaka jong ki dawai ba katei ka longkmie ka dei ban ioh dih bad ban tei ïa ka jing-long jingman jong ka met jongka bad kitei ki khun ba ka pun.
Hynrei, katei ka longkmie ka la kyntait bad ong ba kam dei ka jingbakla hynrei ka dei ka jingleh dusmon bad jingbym shim khia jong kitei ki nongtrei. Namar lada dei ba ki bakla ban shim lane lada kim ithuh ïa ka kyrteng dawai, ki la dei ban kylli bniah ïa ka halor ka jingleit thied jongka ïa utei u dawai lane ba kin iathuh ba utei u dawai pynhap khun.
Haba iadei bad kane, kitei ki nongtrei jong katei ka jaka die dawai ki la shah daiñ kuna bad shah pynsangeh treikam ruh haduh shi snem. Katei ka dukan die dawai ka la siew ïa ka jingdaiñ kuna ba $10,000 ha ka por ba la lap ïa ka jingshisha baroh ha une u Nailur ba la leit.
Kane ka la jia naduh u snem 2019 hynrei la ong ba ka ïingbishar ka dang lah ban pynshisha bad pyndep ïa baroh ki jingpynshisha ha une u Nailur jong u snem 2023 bad ba la daiñ kuna ïa katei ka jaka die dawai khnang ba katei ka dukan kan buh ïa ki nongtrei kiba lah ban shim khia bad ki ban pyrkhat ïa ka bha ka miat bad ka iap – ka im jong ki paidbah kiba leit thied dawai bad kiba shaniah ha ka.
