New Delhi, Risaw:
Ka kynhun Enforcement Directorate ha ka Sngi Ba-ar ka la pynlong ïa ka jingleit khynra ha ka ïingsah jong u MLA ka seng AAP u Amanatullah Khan ha Delhi na ka bynta ka jingtohkit halor ka jingkynnoh kamai spah bymhok pyrshah ïa u bad katto katne ngut kiwei pat, la ïathuh ka tyllong khubor ba la wan na ki heh ka ED. Une u MLA uba la 49 snem ka rta u la mihkhmat na Okhla konstitwensi ha ka Assembly ha Delhi.
Ki heh jong ka kynhun Enforcement Directorate (ED) ki la pynlong ïa ka jingkhynra hapoh ka jingtreikam jong ki kyndon jong ka Prevention of Money Laundering Act. Ka kynhun tohkit ka la shim ïa ka jingthoh ba la phah jong ka Delhi Anti-Corruption Bureau FIR bad ka Central Bureau of Investigation FIR kaba la mudui pyrshah ïa une u MLA, ha kaba ïadei bad ka jingklop tyngka beaiñ ha kaba ïadei bad ka jingpyntreikam ha Delhi Waqf Board.
