Beijing, Risaw:
Ka ‘Great Wall of China’ kaba long ka jingtei mynbarim ban pynsah nam bad pynsah kynmaw ha ka pateng-pakit bad ka thoh-ka tar jong ka pyrthei, hynrei la ong ba kane ka jingtei ka la julor bad duh ne sniew dur noh hadien ba 2 ngut ki nongbylla ki la ksam lynti bad pynpei lyngba tang ba kin ioh ïa ka lynti ba lyngkot (shortcut) bad pynsuk ïa ka jingiaid lynti bad ka rukom treikam jong ki.
Kitei 2 ngut ki nongtrei ki kynthup ïa uwei u rangbah 38 snem bad kawei ka tymmen 55 snem. Kine baroh ar ngut ki la shah kem noh ha ki pulit ka North Province jong ka Shanxi ha ka 24 tarik u Nailar jong une snem hadien ba ki bor pyniaid ki la lap ïa katei ka jingpynkheiñ aiñ ha ki bnai ba la leit.
Namar la ong ba kitei 2 ngut kim shym la pyrkhat ïa ka jinglong kyrpang jong katei ka jaka hynrei kaei kaba ki leh ka long tang ba kin suk ha ka leit ka wan bad ki kam ba man ka sngi.
Ia ka Great Wall la pynrung kyrteng ha ka thup UNESCO World Heritage naduh ki snem 1987.
Kumta, la ong ba katei ka jingtei ka la khring ïa kiba bun ki ‘riew jngoh kai na kylleng ka pyrthei ba kin leit sha China ba kin peit bad sakhi ïa katei ka jingtei kaba long kawei na ki jingtei ba paw nam bha ha ka pyrthei. Na ka liang ki nongleit jngoh kai ruh ki ju iaroh ïa ka jinglong ba kyrpang jong katei ka jingtei ba ka China ka la tei naduh ki por hyndai-hynthai.
